Hmeichhe naupang kum 6 mi, Inrinni (02.01.2021) tlaia bo chu Punjab Jalandhar district-ah pawngsual anih hnuah an that tih police-ten an sawi.
A ruang chu Hazara thingtlâng khuaa fu hmun, Jalandhar-Hoshiarpur road ah Pathianni tlai khân an hmu tih an sawi.
A tuartu nu leh pate chu Bihar a chêng niin, hlawhfa chawpa eizawng ṭhin an ni a, an hnathawk zo ina an va haw chuan an fanu chu an hmuh zawhloh avângin police-te hnênah an thlen a ni.
Santosh, an ṭhenawm a khawsa chuan thirsakawrin dawrah biscuits lei tûrin a hruai a, inah a hruai lêt leh tih a sawi.
Hmeichhe naupang nu leh pate’n chulai chhehvel an zawn ṭan laiin Santosh chu a tlanbo tih police-ten an sawi bawk.
Tichuan, a hnuah an chhungkua chuan Santosh-a chungah thubuai an thehlût tih police thuneitute’n an sawi a, hmeichhe naupang taksa pawh Pathianni khân an hmu tih an sawi bawk.
Atîr a an chhuichiannaah chuan hmeichhe naupangtê chu pawngsual anih hnuah thah anih an rin thu an sawi a, a taksa chu post mortem tûrin an thawn tih police-ten an sawi.
IPC section hnuaiah mi rûk bo, pawngsual leh tualthah thubuai leh Protection of Children from Sexual Offences sections hmangin thubuai ziahluh a ni a, police-te chuan Santosh a chu man an tum mêk tih an sawi bawk.
