Inrinni zân (Dec 19) khân Fartown street, West Yorkshire-ah pa pakhat kum 26 a upa chuan ṭanpuitu auvin mangang takin a au a, a chhehvela chêngte’n a mangang au thawm lo hriain chu mihring chu hliam na tak tuarin an hmu tih an sawi. He thil thleng kaihhnawihah hian mi pakhat man a ni tawh niin an sawi.
Christmas thlen nân ni rei lote chauh a awm tawh tihah, mi pakhat chu silaia kah niin, ‘min ṭanpui ru, min ṭanpui ru’ tia auvin a boral zui ta a ni. Kum 26 mi au thâwm chu chumi bula chêngte’n an hria a, Inrinni zân dar 9pm hnuah hliam tuarin an hmu tih an sawi.
Fartown a inkahna a thlen hnuah emergency services koh nghal an ni a, tualthattua rinhlelh pawh an man nghal a ni. West Yorkshire Police Spokesman chuan vanduaina tawk hliam tuar mipa chu damdawiin lamah tlanpui nghal a ni tih sawiin, reilotê hnuah a boral zui tih a sawi.
He inkahna hmuna chêng mi pakhat chuan Inrinni zân dar 9:10pm ah thil puak ri vawi 2 an hria tih Yorkshire Live hnênah a sawi. Kum 23 a upa chuan, “He thil thlen lai hian TV ka lo en mêk a, thil ri chu ka hriatchian theihnân ka thil en lai chu ka paused ta a.
“Mipa ṭanpuitu zawnga au ri ka hria a- ‘min ṭanpui ru, min ṭanpui ru’ tiin. Ka patea chu ṭanpui tûrin ava chhuak a, mipa car vâr chhûnga lo awm chu a hmu a, midang an lo thlen belh thlengin a awmpui ta a ni. He thil thleng avâng hian a khûr nasa hle” tiin a sawi.
West Yorkshire Police-te chuan Inrinni zân a tualthahna thleng kaihhnawih ah Huddersfield lamah chhuichianna an nei mêk tih an tarlang.
He silai inpawng kahna thleng hi chhuichianna neih mêk a nih avangin kawngpui pawh dan chah a nih thu police-te chuan an sawi.
