Puspa Dewi, kum 53 mi, Instagram entrepreneur chu a kum upat ngaihtuahin ala lang naupang hle mai a, chuvângin, mite hriat a hlawh hle.
Jakarta, Indonesia aṭanga lo chhuak Puspa chu alan naupan êm avângin, an vawikhat hmuhnaah chuan a fapa bialnu-ah an ngai fo ṭhin a ni.
Nimahsela, fapa 2 nei tawh hi a pasal kum 56 a upa nen kum 1993 aṭang khân hlim takin an la innei mêk zel a ni.
Mite’n an ngainat avângin ‘Mama Hadi’ tiin Instagram lamah chuan hriat a ni a, kuminah pi (grandmother) anih tawh hnu pawhin a landân chu ala naupang hle. A fapa upa zawk leh a nupui chuan kumin February thla khân fapa an nei a ni.
A lan naupanna thurûk chu, Puspa chuan a pianpui bâkah nun hrisel tak a nei a, a êng zawnga thil thlir ṭhin mi a ni bawk.
CGTN in a târlan dân chuan, a taksa mamawh tâwk ang chiahin thil a ei ṭhin a, nitinin taksa insawizawina hun a nei ziah tih an sawi.
Veteran swimmer leh badminton khel ṭhin Puspa chuan tunlai infiamna dang pawh a khel ṭhin tih sawiin, tunah chuan zumba leh aerobics a ti ṭhîn tih a sawi.
Pi ni tawh chuan a hmangaihte bula awm leh a hlimna tûr thil atihte chuan lang naupang tûrin a pui bawk niin a sawi.
“Mite chuan i upa tulh tulh a mahse i lang naupang telh telh min tih chu adik in ka hria, achhanchu, ka hlim zual tawh a ni, ka fate an puitling vek tawh a, ka duh ang sumdawnna ka enkawl thei tawh” tiin Indonesian news outlet Detik hnenah a sawi.
Puspa chuan Instagram-ah followers 473,000 a nei a, a workout lai te, an chhungkaw thlalak tam tak te, TikTok dance video te a pholang ṭhin a ni.
