Chhungkaw pakhata member 3-te chu karthum liamta khan ruk chhuah an nia, a hnu lawkah an lu tansak an ni zui ta a ni. Police te chuan he thil hi chhui zui nghalin an khaw daktawr lem (quack) in nausen thihnaah dawilam thil hmanga a puh vang niin an sawi.
Hemite 3 hi Jharkhand, Khunti District a cheng an ni a, an khaw mite chuan dawilam thil hmangah ngaiin an lu an tansak ta a ni. A chhan ber chu daktawr lem (quack) in nausen thihna chungchangah an chhungkua hi dawithiamna chhawra a puh vang a ni.
Mithi taksa bung thenkhatte chu Khunti ramngaw chhah tak chhungah hmuh an ni a, he hmun atang hian Birsa Munda (48) leh a nupui Sukru Purty (43) leh an fanu Somwar Purty (20) te ruang chu an la chhuak tih hriat a ni. An lu leh taksa pengte chu a lo darh nuai niin an sawi.
Tualchhung miten India Today TV an hrilh danin, hmanni lawk khan nu pakhatin naute a neia, chu a naute chu ni reilote hnuah a boral zui ta maia a thih hnuah chuan an khuaa daktawr lem (quack) chuan, a thih chhanah Birsa Munda chhungkuaten dawi thil an hman vangah puhin an buai phah hle a ni.
Tun thla October tir lam ah khan Birsa Munda te chhungkua chu rukbo an ni a. He thil hi mite hriata alo darh nachhan pawh Birsa Munda fanu Telan chu a chhungte hmu tur a kal laiin tumah a hmuh zawh tak loh vang a ni.
An khua ava thlen chuan tumah an lo awm lova, a nu leh pa leh a unaunute hmuh tuma a zawn ngial pawhin tumah hmuh tur an awm ta lo a ni. Telani chuan thil diklo a awm ngei a ni tih ringin Police te hnenah a thlen ta a ni.
Police te chuan mibo zawn hna chu squad dinin an thawk tan nghala mahse, hma an sawn thei lo hle. A tawpah chuan, an bo nachhan dik tak chu an hre chhuak thei ta hlauh mai a ni.
Police te chuan thubuai ziak lut nghalin he khua ami thiamloh chantir 9 zinga mi 3-te chu man tawh an nia, midangte pawh man tuma veh mek an nih thu SP Khunti, Ashutosh Shekhar chuan a sawi.
SP chuan sawi chhunzawmin an mi man tawh 3-te chuan he thil thleng hi an tih ngei a nih thu an inpuang zui bawk. Heng mi 3 te hi an ruang endik a nih hnuah vuina hun neih a ni.
