Zirlai, hmeichhe naupangtê chu damdawi ina enkawl anih mêk laiin a chunga thilthleng rapthlâk tak mai chu huaisen takin a sawichhuak a, hetih mêk lai hian Police-te chuan an mi rinhlelh 3-te chu pawngsual thubuai an awrhtîr loh avangin, hmeichhe naupang chhungte chu Police-te chungah an thinrim hle.
Kum 13 mi, Indian hmeichhe naupangtê chuan rûkbo anih dân leh ni 8 chhûng teh meuh pawngsual rawn anih dân chu huaisen takin amah enkawltute damdawi ina thawkte hmaah a sawichhuak a ni.
He hmeichhe naupang hi Delhi-ah a chhungte’n an chhanchhuak a, mipa 3-te chu man an nih hnuah thubuai siamsak an ni.
Hmeichhe naupang chuan damdawi ina reporters-te hnênah, “Zîng kâra ka chhuah laiin, mipa 3-ten tihluihnain motor chhûngah min khung a. Ni 8 chhûng chu min pawngsual rawn ta a ni. Mi hnena ka sawi anih vaih chuan, ka chungah thil rapthlâk tak an tih tûr thu in min vo zui bawk” tiin a sawi.
January 15 khân Uttar Pradesh Mainpuri aṭangin hmeichhe naupang chu an ru bo a, Ningani (January 28) khân Aucha police station-ah a nu leh pate nên an kal tih Times of India chuan a târlang.
Naupang chhûngte chuan, thiltisualtu Aakash, Etah district mi leh Hariom leh Guddu, Mainpuri mite chu Police-ten mihring rûk thubuai chauh an ziahluhsak tih an sawi.
Hmeichhe naupang patea chuan a lungawilohna thu a sawina chanchinbua an tihchhuahah chuan, “Hmeichhe naupang hi a bo tirhah Police-te kan hrilh lo, a chhan chu vantlângah a darh palh a hlauhawm avângin leh naupang vên tel a ngaih avângin keimah niin kan zawng a. Delhi-ah kan chhanchhuah hnuin, ni 8 chhûng mipa 3 in an pawngsual tih kan hre ta a, Police-te hnenah thubuai kan thehlût ta a ni” tiin a sawi.
Inspector Rishi Kumar, Aucha police station chuan thubuai an ziahluhah pawngsuala puhna chu an ziaklut lo tih a pawm a, Thawhṭanni a magistrate hnena a thusawi dân a zirin an ziahluh tûr thu a sawi bawk.
