Vawiin Nilaini, November 25 ah footballer ropui tak Maradona chu lungphu châwl (cardiac arrest) in a boral. Football khawvel chuan Maradona an ui thu chu an ziak chiai chuai mai a ni.

He football legend hi damdawiinah thluak a thisen tlin vângin zaipui a tawk a, damdawiin a chhuah aṭanga kar 2 a liam tihah heart attack a nei zui ta a ni.

Maradona hi khawvêla footballer ropui ber zing ami niin, Argentina chu kum 1986 World Cup khan alo champion pui tawh a, a thlen sân puiin ropui takin a khel a ni. A thiam êm avângin ngaisangtu tam tak a nei a, Boca Juniors, Barcelona leh Napoli te hi a khelhna Club-te an ni.

Lionel Messi, Argentina ram tâna Maradona thlaktu nia chhal leh tunge GOAT tia a khingpui ni bawk chuan, a Instagram account ah lungchhe takin a idol thlahna thu a ziak chhuak a ni.

Maradona hnuaiah ram tan kum 2008 leh 2010 khan alo khel tawh a, Barcelona superstar chuan thla an lak dunna 2 pho chhuakin ti hian a ziak a, ‘Argentina mipuite leh football khawvel tan ni lungchhiatthlak tak a ni. Liam mahse min chenchilh reng, achhanchu Diego chu a nung reng a ni.

‘Amah nena hun hlimawm tak kan hmante kha ka hre reng tawh ang a, a chhungte leh ṭhiante ka tawrhpui takzet a ni, RIP.’ tiin Messi chuan a ziak a ni.

A club hluite leh Argentine National team Twitter account te chu an ui thu ziak hmasa ber an ni.

Barcelona, season 2 1982–1984 alo khelh tawhna chuan, ‘Engkimah khan kan lawm e, Diego’ tiin an tweeted a ni.

The AFA chuan, ‘The Argentine Football Association, president Claudio Tapia kaltlangin, kan legend Diego Armando Maradona thihna hi thinlung takin kan tuar a ni.

‘Kan thinlungah hian i cham reng ang.’

Boca Juniors, Argentina á a career ṭanna leh a hman tawpna chuan, ‘Kan lawm bang dâwn lo. Chatuan atan Diego’ tiin an tweeted bawk a ni.

Napoli, Maradona an kum 7 chhung 1984–1991 a khelhna, Serie A title erawh vawi 2 chauh 1987 ah leh 1990-a a lakpuina chuan, ‘Chatuan atan. Ciao Diego’ tiin an ziak a ni.

Football legend dang, mi ropui Brazilian Pele chuan tihian ziakin: ‘Chanchin lungchhiatthlak tak ava ni em! Ṭhian ropui tak ka chân a, khawvelin legend a chân bawk. Sawi tur tam tak a awm, mahse tun tan chuan, Lalpan a chhungte chakna pe mawlh rawh se! Engtik ni ah emaw chuan vanah khian kan la inkhel dûn ngeiin ka ring a ni.’

Infiam mi zawng zawngten an sûn a, Manchester United striker Marcus Rashford pawn a thih thu a hriat veleh zahna lantirin thumal pakhat ‘Legendary’ tih chu a vânglai a mite ngaihsan rawn Barcelona leh Napoli player thlalak nen a tilang a ni.

Cristiano Ronaldo paw’n Maradona nena an thlalâk hlui chu a Instagram account ah pholangin tihian a ziak a: ‘Vawiinah ṭhian ka thlah liam a, khawvelin a thiamna nghilh tawh ngai loh tûr a thlah liam a ni.

‘A thiam ber zinga mi. Midang tih theihloh thilmak ti thin. A kal hma lua a ni, mahse rochhiah tâwp tawhlo tur a hnutchhiah a, a hmun ruak hi hnawhkhah theih a ni ngai dawn lo a ni. Thlamuang takin chawl ang che, ace. Nghilh ni i awm ngai dawn lo’ tiin Cristiano Ronaldo chuan a ziak a ni.

Manchester United defender hlui Rio Ferdinand chuan Maradona nen an thlalâk ṭhenkhatte pho langin, ‘Ka football hero hmasa ber. Chhuan tamtak thlenga thil thlak danglam thei Maradona ang hi tlemtê chauh an awm. Mi ropui, ṭha ber, mi thiambik chungchuang, mipa diktak.. midang hneh thei tak, hruaitu…HNEHTU!

‘Kan In chhuahsan a football khelh ka tumna chhan ber chu Maradona an ka tum vâng a ni. RIP Diego Armando Maradona’ tiin Ferdinand chuan a ziak a ni.

Football legend Maradona boralna hian football khawvel piahah mi zawng zawng a ṭhawng takzet a. Footballer te’n an uiin zahna chibai an bûk hlawm a. An zavai thu ziah ziakchhuak tur chuan a sei lutuk dâwn a, an thu post te ka lo tarlang e.

‘Football legend, Diego Farewell. RIP.’

LEAVE A REPLY

Please enter your comment!
Please enter your name here