BAREILLY: District hospital, UP Moradabad district a ward boy kum 46 mi chu health worker anih angin vaccine Covishield chu Inrinni khân a dawng ve a, a hnuah “thaw hah leh nawmsam lohna neiin, a bik takin a âwmah harsatna a nei” tih sawiselna a neih hnuah a boral zui tih an târlang.
Dr MC Garg, the Chief Medical Officer (CMO) chuan TOI hnenah, “Mahipal Singh (ward boy) chuan Covishield vaccine chu Inrinni chhûn dar 12pm khân a la a, Pathianni tlai alo nih chuan a âwm chu na tiin a thaw a hah ta a ni. Vaccine a lâk hnuah zân lamah hna a thawk tho a, vaccine a lâk vâng anih chu kan ring lo a ni. Nimahsela, a thihna chhan diktak chu kan chhuichiang dâwn a, a taksa chu arang thei ang bera endik tûrin kan thawn dâwn a ni,” tiin a sawi.
Moradabad district-ah chuan a nikhatna atân Health worker mi 479 vêl lai vaccine pêk an ni. Mahipal chhûngte chuan Covid-19 a vei ngailo tih an sawi a, sawrkar in tihtûr a tih ang a zâwm mai a ni tiin an sawi.
Mahipal fapa Vishal chuan, “Kapa chu va vaccine a lâk hnuah a nuam sam lova, a two-wheeler pawh a khalh theihloh avângin min rawn bia a, auto a hruai mai tûrin min ti a ni. Dar 1:30pm vêlah ka va thleng a, a dinhmun chu alo ṭha vak lo hle mai a, a awmdân a pangngai lo tlat, a thaw a hah a ni. Ni eng emaw liamta, ni 14 vêl a ni ang, tlêmtê in a khua erawh asik ve. Kapa chu ka haw pui a, thingpui siamsakin ka muttîr a, Pathianni alo thleng a, hna ka thawh hlânin kapa dinhmun chuan zual lam panin damdawiin panpui anih hnuah a boral thu an puang ta a ni. Kei chuan vaccine nghawng ngeiah ka ngai tlat,” tiin a sawi.
