Wayne Rooney fapa upa ber Kai chuan Manchester United a zawm. Kai, 11, contract sign lâi chu a pa leh a nu Coleen te’n thla an lakpui a ni.
Kai chuan a jersey hnung lama number 10 chuang chu kengin a tilang bawk a, a pa in Old Trafford a châm chhûnga ropui taka a khelhpui ṭhin number a ni bawk.
England Captain hlui Rooney chuan, “Ni ropui tak a ni. Kai chuan Manchester United a zawm ta. Ka fapa rim takin thawk zel ang che” tiin Instagram ah a ziak a ni.
Coleen paw’n a Instagram page ah, “Zân danglam bîk tak a ni……Kai ka lawmpui lutuk che. Ka hmangaih che a ka chhuang lutuk che. Theihtâwp chhuah zêl ang che” tiin a ziak ve bawk.
Rooney chuan Manchester United tân ropui takin kum 13 chhûng 2004–2017 a khêl a, kum 2014 khân club captain alo ni tawh bawk a ni.
Man United club record scorer ni lai mêk chu Rooney niin, khelh 559 ah goal 253 a pêt lût a ni.
Rooney, 35, chuan Red Devils tân major trophies 12 a lâkpui a, Premiere League vawi 5 leh Champions League 2008 a a lâkpuite pawh an tel.
A hun laia player ṭha ber pâwl a ngaihtheih Rooney chu tunah hian Derby County tân player-manager in a awm mêk a ni.
Kai chu Rooney fa upa ber a ni a, an nupa chuan fapa 3– Klay, 7, Kit, 4 leh Cass, 2, te an nei bawk.
