Belle Barbu chu nautê anih laiin lâk bo a ni a, American chhungkua pakhat hnenah hralh a ni. A nu leh pate hnênah dawt hrilhin an fanu naupang tê chu a boral tiin an hrilh a ni. He thil hi kum 25 liam hnuah an hrechhuak ta chauh tih an sawi.
Nu leh pain an fate an hloh aia lungngaihna nasa hi a awm kher awm love. Mahse, nupa tuakte chu an fanu a boral tih an hrilh aṭanga kum 25 liam hnuah ala dam thu an hre ta a, ram dang hla tak a American chhungkua hnênah an lo hralh alo ni.
Belle Barbu, tuna kum 26 na hmang mêk, Utah a chêng chuan, nausên anih laiin lâk anih thu leh American chhungkua zinga hralh anih thu chu kum liamta khân a hrechhuak ta a ni.
Alo ṭhang chho a, a nu leh pa nên in anna pakhatmah an nei bawk si lo, mahse kum 8 alo nih chuan nausên anih laiin fa atâna an lâk thu an hrilh a ni. A lo pian chhuahna hnam hming dik tak chu an hrilh a, Romania a apian thu leh a nu leh pate’n an duhlo thu an hrilh tih The Sun chuan a tarlang.
Belle leh fa atâna latu a nu leh pate inlaichinna chu University a luh ṭantirh aṭangin a kehdarh ta a, mahse alo chawr chhuahna chu a ngaihtuah bâng lo a ni.
Kum 2019 alo thlen chuan, Romanian midang fa atâna an lâk hote’n an chhungkuate an hmuh theihna tûra ṭanpuitu Facebook group a hmu fuh hlauh mai a, post turin rilru a siam fel ta a, chhânna a dawng nghal chu mak a ti hle nghe nghe.
Darkar 48 chhûngin, group enkawltu hmeichhia chuan social media-ah a unaupa Moise kum 20 mi chu a be tlang thei ta a ni.
Ṭawng lehlin kaltlangin, Belle chuan a unau 2 dang– a unaunu Simona, 33 leh a unaupa Florian, 29 te chu a hmuchhuak leh bawk. Alo pian chhuahna, a nu Margari leh a pa Zambila-te chu Rome ah an chêng a. Kar 3 liamhnuah phone in an inbe thei ta bawk a ni.
Belle chhûngte chu 1994 a alo pianchhuah lâi chuan an rethei ve hle a, Dâktawrte chuan a damlo tih hrilhin ni reilote hnuah a boral tiin a nu leh pate hnenah an hrilh a ni.
Belle chuan, “Dâktawrten ka damlo tih an hrilh a, in lama an haw kârah damdawiinah ka lo awm a. Ni reilote hnua an lo lêt chuan ka boral thu an lo hrilh a ni. Chu thu chuan ka nu leh pate chu a ti keh chhe chiang hle.
“An kal hnu chuan nurse chuan lâk ka nih thu leh min hralh thu chu hrilh tumin ava um hlawm a ni. Ka nu leh pate chuan an pawisa neih chhunte chu petrol lei nân an hmang zo a, min hmuh tumin fahrah in tinreng chu an zawng a ni. Mahse an pawisa neih an hmang zo vek tawh a, kum a liam chuan tihngaihna an hre ta ngang lo a ni” tiin a sawi.
Charity Operation Underground Railroad chuan Belle hnenah nau piangchhuak hlimte chu trafficking gangs ho hnenah £10,000 man anih thu an hrilh a, birth certificate lem siamin fa atâna duhtute hnenah adoption agencies kaltlangin an hralh ṭhin thu an sawi a ni.
Charity-te chuan DNA test an neihsak a, a chhungte nen inlaichinna an nei ngei tih an finfiah a ni. Belle chuan a nu leh pate chu 2019 khân Rome ah a hmu thei ta a, inzawmna an nei ngei tih sawiin, in mangṭha a harsat thu a sawi. Covid-19 leh pawisa harsatna avângin Italy ah ka la zin thei lova, mahse ka tih theih veleh zin nghal ka tum tiin a sawi bawk.
“Naute ka nih laia ka chunga thil thleng chu ka hre ngai dawn lo a ni mahna, mahse, ka tih theih tur zawngin hmalam ka thlir a ni. Tunah chuan Organisations ho nen thawk hovin,chung zingah chuan Operation Underground Railroad pawh an tel a, ka thiltawnte ka sawi ṭhin a ni.
“Ka chanchin hria apiangte chu human trafficking aṭanga dam khawchhuakte chu thil thlawn pek emaw an chanchin an sawi an awihsak aṭangin an ṭanpui thei tiin ka hrilh ṭhin” tiin Belle chuan a sawi a ni.
