WWE champion Becky Lynch chu nu a ni ve ta. WWE star lar Kum 33 a upa hian a pasal hual Seth Rollins nen an hlimna tibelhchhah turin fanu duhawm tak mai an nei tih nimin Thawhtanni khân Instagram ah an chhungkua thlalak lungkuai tak mai chu a pholang a ni.
“Khawvêlah hian kan lo lawm a che Roux. Kan hringnuna hmangaihna chu i ni” tiin Irish fighter chuan a thlalak pholanah a ziak tel bawk. Seth Rollins, a pasal leh wrestler ni bawk chuan a account ah a thlalak hman ang chiah chu a hmang ve bawk.
Becky hi a hming tak chu Rebecca Quin a ni a, kumin May thla khân Raw ah naute a neih tur thu hi alo puang lawk tawh a ni.
Chumi hnu lawkah People hnenah Becky chuan, “Fa neih hi ka duh reng ṭhin a, ka hnaah hian rilru zawng zawng ka pek ṭhin avangin hetiang thil hi engtikah nge ka tawn ve ang tiin ka ngaihtuah fo ṭhin” tiin a sawi.
Becky leh Seth te hi kum 2016 ah an thlalak black and white an pholan aṭangin mipui hriatah an inkâr hi hriat ṭan a ni a. Thla 3 hnuah an inhual zui ta a ni.
“Kan awmdun hnuin, thil chu a langchiang lehzual a, a ni chu ka fate pa atâna ka duh chu a ni tih ka hria– chu chu a thleng dawn tih ka hria a, engtikah nge tih chauh a ni zawk” tiin Becky Lynch chuan People a hrilh a ni.
“Seth hi ka mi hriat tawhah chuan ṭha ber leh fing berte zing ami a ni. Hnathawh a taima êm êm a, dikna a ngaina hle bawk, mi thilphal leh ngilnei tak a ni.
“Thildik ti turin a rilru a pe nasa hle a, insiamṭhat ngaiah chuan insiamṭhat tumin hmasawn zel a duh a, ka tan mi ṭha ber ni turin ṭan a la a, tunah chuan pa ṭha ber a ni ta” tiin a sawi chhunzawm a ni.
Vanduaithlâk takin kumin May thlaa innei tura an ruat sa vek tawh chu hripui lêng vângin an ti thei ta lo a ni.
Becky Lynch chuan kum 2013 a WWE a luh hmain, pro-wrestlingah a tleirâwl laiin kum 2002 khân Ireland ah training a nei ṭan tawh a ni.
April 2019, Wrestlemania 35 khan triple-threat match ah Ronda Rousey leh Charlotte Flair chu hnehin, WWE Raw leh Smackdown Women’s Champion alo ni tawh bawk. A hnuah Smackdown belt chu Charlotte Flair lakah a hloh leh ta a ni.
Nimahsela, Raw Women’s title chu ni 400 chhûng a humhim a, a rai thu a puan hnuah Asuka hnenah a hlân ta a ni.
