East Tennessee-ah phir unaute chuan an pianchamphaphak ah tak naute hmeichhia duhawm tak an nei ve ve a, minutes 90 in an inthlau a ni.
He thil duhawm tak hi October 29, Ningani (Thursday) khan Fort Sanders Regional Medical Center, Knoxville a thleng niin, phir unau Autumn Shaw leh Amber Tramontana ten fa Charleston leh Blakely te chu an nei rual a ni.
‘Kan fate hi kan pahnih ang chiah hian thang rual chho sela tih kan duh a, chuvang chuan, inhnaih taka naute neih hi kan duh a ni. Mahse hetiang anga inhnaih tur erawhin ruahmanna kan siam miah lo thung’ tiin Tramontana chuan WATE hnenah a sawi a ni.
Hetiang thilmak hi a thleng zen zen lova, 150,000 ah vawi 1 thleng chauh anga chhút a ni.
An pahnih hian nau neihna room inhnaihtein an buatsaihsaka, Dr. George Vick chuan enkawlin Charleston chu a piang hmasa a, a hnu reilote ah Blakely chu alo piang veleh nghal a ni.
Dr. Vick chuan, ‘Hetiang hi thil pangai lo leh thleng zen zen lo thil a ni. An pahnihin an naute neih ni tur a in ang tih kan hriat khan, a vaiin Pathian remruat vang chauh a ni’ tiin WATE a hrilh nghe nghe.
Vick chuan sawibelhin hetiang thil hi kum 45 a thawh chhung zawngin ala tawn ngailoh thil anih thu a sawi bawk.
Naute pahnihte hi October 29 ah piangin an nu te unau, Amber leh Autumn’s kum 33 na piancham niah chiah chiah an piang chhuak a ni. He mite 2 hian kum tamtak chhung chu thil engkim an lo ti dun tawh thin a, tunah naute pawh an nei dun/rual leh ta tho a nih hi maw.
“Naupan tet ata, high school, college leh nursing school, nurse practitioner school leh kan fapate kar 10 chauha in thlau kum in rual ni bawk, chuan tunah kan fanute an ni leh a” tiin Autumn chuan a sawi lang.
Tunah hian an chhungkua in October 29 ah piancham a ruala mi 4 lawm tur an nei ta a, he hun hi an nghakhlel tawh hle a ni.
