Hmeichhe naupang kum 7 mi chu a nutei’n thla tam tak chhûng kut a lo thlak fo avângin, a pangti ṭhenkhat ṭawihin a bân tansak angaih phah hial a ni.
Makka Ganieva, 36 in naupang nasa taka a nghaisakna chanchin chu Russia court-ah ngaihthlâk a ni.
He hmeichhe naupang hi kum 6 a nih laiin a nu chuan harsatna nasa tak a tawk a, chuvângin a nute Ganieva bulah a awmtîr ta tih an tarlang.
Naupang kut chu a pûn nasat avângin a nutei’n damdawiinah a hruai a, chumi aṭang chuan a chunga thil thleng rapthlâk tak chu hriat chhuah a ni ta a ni.
Dâktawr chuan naupang bân dinglam a pangti ṭawih chu a endik a, chumai bakah a taksa kâng leh sehna leh chemte a zaina hnuhma te hmuh a nih thu a sawia, rapthlak a ti hle.
Ganieva chuan hmeichhe naupang inhliamna chhan chu a sawifiah theihloh avângin damdawi in a thawkte chuan Sunzha, Southwestern Russia police-te hnênah thubuai an thlen zui ta a ni.
Detective-te hnenah chuan a vahnu kut chu a vuaknaa tliak anih thu a in puang a mahse, ni tam tak a liam hnuah chauh Damdawiin a panpui a, chutah chuan a bân chu vawt zoin a thi tawh tiin Investigator-te a hrilh. Hmeichhe naupang tê chu khawsik hluah hluah chungin Moscow-ah an thawn a, a kut dinglam ṭhenkhat chu an tan chhum ta a ni.
Dâktawr te chuan, ât phah theihna khawp hial natna a tawrhna chuan a rilru lamah nghawng neiin, tidam tur chuan kum engemawzat a mamawh tur thu an sawi a ni.
Ganieva hnenah thla 7 a awm chhunga, naupang chunga thil thleng rapthlâk takte chu uluk taka an chhui hnuah thil nihna an puangzar ta a ni. The Sunzhenskiy District Court hnenah, naupang chu thuk sa ah te nem bet a ni a, tichuan chemtê leh bakcheh hmangte a sawisak a ni.
Prosecutor Maksharip Dobriev chuan tualchhung chanchin lakhawmtute hnenah, “Ganieva chuan hmeichhe naupang chu kum 2018 December aṭangin July 2019 thleng chu a thiltih sual hlekah a nu chuan a vaw ṭhin a, vuakna avângin hliam nasa tak a tuar a, a kut dinglam ṭhenkhat chu tan chhum a ngaih phah ta a ni. He thilsual titu hi court chuan thiamloh a chantîr a ni” tiin a sawi.
Ganieva chu midang nghaisak leh naupang chunga râwng taka a chêt avângin kum 6 chhung jail tang tura thiamloh chantîr a ni. Naupang nu chuan sum lama harsatna a tawh nasat êm avângin a nutei bulah nun nuam tak a hman a rin thu tualchhung thuthar lakhawmtute a hrilh a ni.
A nu chuan, a thutlûkna siam chu a inchhir takzet tih sawiin, “Hremna an pek chu a nep lutuk, ka fanu hian tih duhdahna rei tak a tuar a, ât phah theihna khawp hial tuarin a rilru a nghawng bawk a ni. Tunah a taksa pawh a ṭha lova, ngaiawh leh tur chuan kum tam tak a mamawh” tiin a sawi bawk.
An ṭhenawmte chuan, Ganieva-i’n a fa dik tak 2-te chu a tina ngai lo tih an sawi ve thung a ni.
