Phîr unau zinga pakhat chu an chhûngkua swimming pool ah a tla sual hlauh mai a, pakhat zawk chuan chhan a tumna lamah vanduaithlâk tak maiin an boral ve ve a ni.
Phîr kum 2 mi Ethan leh Sebastian-te chu kan hnung weekend khân South Africa ah an ruang chu tuia hmuh an ni.
Police-te chuan he thihna lungchhiatthlak tak thlen dân hi an chhuichiang mêk a ni.
Tualchhung ambulance service spokesman chuan unau 2-te thih thu hi a puangzâr a ni.
“Rescue Care Parademics te chu phîrte pool a an tla tih an hriat veleh a hmunah an thleng nghal vat a. An nunna chhanhim tumin theihtâwp an chhuah a ni.
“Mahse, an thil tum chu hlawhtling lovin, phîr unaute thih thu chu thil thlenna hmunah an puang nghal a ni” tiin ambulance service spokesman chuan a sawi.
Naupang pu Ivan Ikes chuan, “Naupang 2-te chu pawnah an vak kual vel a, nau awmtu in a vil reng emaw tih laiin alo hre lo a ni tiin The Sun a hrilh a ni.
Mr. Ikes chuan social media ah tihian a tarlang a, “Mipa naupangte chu an tho a, pawnah an chhuak a, pool daidanna kawngkhar chu an khawih an khawih hnuah eng emawti tiin an hawng thei ta a ni.
“Naupang 1 zâwk chu a tla hmasa a, a unaupa chu alo chhuah theihnan zaizira a hrilh hnuah chhan tumin ava zuanglut ve ta a ni. An vanduaina ata dam khawchhuah tumin, an nunna in a tlin tawhloh thlengin Kreepy Krawly (pool tihfaina) an vuan char char a ni” tiin Ikes chuan a sawi.
He thil thleng rapthlâk tak mai hi CCTV chuan alo la a, gate an hawn aṭanga an tlak hun thlengin alo la vek a ni.
Mr. Ikes chuan social media ah thlahthu lungchhiatthlak tak mai a tarchhuak a, “Kan nunah a rualin an lo lût a, a rual vêkin min chhuahsan leh ta” tiin a sawi a ni.
