Argentina ah kum 12 mi chu dân anga nau tihtlâk phalna hnawlsak anih hnuin phîr a hring chhuak.
Hmeichhe naupang, a hming târlan loh hi Children Hospital Dr Hector Quintana, San Salvador, Jujuy Province Argentina ah naute zaichhuahsak tura tih a ni. November 29 a zaipui a tawh hma, a pum a naute awm, a puitlin thlengin an nghah luihtîr a ni.
Kum 12 mi chu dân in a phal angin Children’s Ombudsman enkawlna hnuaiah a nu leh pate’n an dah tih Network of Health Professionals for the Right to Decide chuan an tarlang.
An thuchhuahah chuan naupang kum 12 mi pumchhunga naute an zai chhuah chu an dem thu an sawi a, a kum naupan avângin dân in a phal angin a pum chhunga nautê nunna tihtawp theihna a nei a ni tiin an sawi bawk.
Argentina ah nau tihtlâk chu dân in a khap nachungin, dân vêk chuan hmeichhia in pawngsual a tawh vâng emaw a nunna atâna pawi thei thil anih chuan nau tihtlâk a phal a ni. An ram hi Catholic sakhaw ngaihsak mi an tam bawk a, nau tihtlâk kawngah dân khauh tak tak an nei nual a ni.
Zaipui avângin naupang taksaah ser a awm hlen dawn tih an sawi a, chumai bakah a rilru lam thlengin nghawng a nei thei tih an sawi bawk a ni.
Thuneitute chu a tuartu naupangin fa hringchhuak lo theilo dinhmuna a awm thlenga hun an khawhraltir avângin dem an hlawh hle a ni.
Hetiang thilah hian UNICEF chuan dân siamin naupang kum 15 chin hnuailam naupaite chu an hriselna nghawng thei anih chuan an puma naute nunna chu tihtawp sak a remti a ni.
The National Direction of Sexual Health chuan an huamchhunga thuneitute biain hmeichhe naupang chu ṭanpui nghal turin an ti a mahse, an che muang hle a ni tiin thuchhuah chuan a tarlang. Thuneitute chuan engvanga he case hi tikhawtlai nge an nih hriat chian a ni lo a ni.
Naupang kum 12 pawngsuala puhna leh a fa phirte chungchângah thu hriat tûr dang ala awm lo a ni.
Kumin chhungah ringawt, Jujuy Province ah kumtling lo hmeichhia aṭangin nautê 685 an piang tawh a ni.
Tualchhung chanchinbu Todojujy chuan, hmeichhe 20 te chu kum 10 aṭanga 14 inkar niin, pawngsual annih thu an tarlang.
Health ministry in an chhût dân chuan kumtinin a tlêm berah dân phalloh in nautê 350,000 tihtlâk ṭhin anih thu an sawi.
Mipui tam tak pungkhawmin sawrkar chu nau tihtlâk phalna dân siam turin an nawr a ni. Nautê tihhlum phalna tûr chungchâng hi parliament ah vawi 9 an putluhna tur a ni tawh a, kum 2018 khân Chamber of Deputies ten an pawmpui a mahse Senate in alo hnâwl a ni.
Bill thar chu President Alberto Fernandez campaign thutiam niin, an rai aṭanga kar 14 chhungin an ti tla thei ang a, hmeichhia chu pawngsual emaw pawngsual tâwk thei dinhmuna a din chuan chu aia rei pawh pawm anih tur thu a sawi a ni.
He bill hi Pope Francis, Argentina mi ni bawk chuan a dodal nasa hle a, nau tihtlâk chu “Harsatna sutkian nâna tualthattu ruai nen a in ang chiah” tiin a sawi a ni.
Pope chuan lungawilohna lantîr tute hnenah dân thar chu beilet tûrin fuihna thu a ziak a, hmeichhiate chu “Ramin a chhuang che u” tiin a hrilh hlawm a ni.
