United States, California, San Diego sahuan pakhat Safari Park a awm zâwng lian ber chi ‘gorilla’ te chuan coronavirus an vei tih The New York Times chuan a târlang.
Gorilla 8 te chu hmunkhata a awm ho an ni a, an zînga 2-te chu an khuh avângin endikna an nei a, virus an kai tih hmuhchhuah an ni. Chuvângin, anmahni nena awm ho zawng zawngte chuan natna an kai vek a rin thu executive director Lisa Peterson chuan a sawi.
He sahuan hi December 6 khân, California lockdown aṭangin khâr alo ni tawh a, chuvângin, gorilla-te chuan sahuana hnathawktu tu emaw ber hnen aṭangin an kai an rin thu an sawi a. A hnuah, hnathawktu pakhat chuan Covid-19 a positive tih an hmuchhuak a, gorilla-te bulah chuan mask a vuah reng ṭhin tih a sawi.
Gorilla-te chuan Covid-19 natna chu eng ang takin nge an tawrh ang tih an la hre thei lo a ni.
