El Husseineya Central Hospital a video manganthlak tak mai chu online lamah a viral chiam mai a, chu lai hmuna vanduaina thleng chu thuneitute’n thup bo an tum chungin hailan a ni ta tho a ni.

Intensive Care Unit (ICU) a Covid-19 damlo zawng zawngte chu oxygen an hman lai a zawh avângin Egypt damdawi inah an thi vek tih an târlang.

Video clips social media-a an tihchhuahah chuan hospital staff-te’n Covid-19 damlo thi mai turte CPR an tihsak lai hmuh theih a ni a, chutih lai mêk chuan damdawiin pindan aṭangin au thawm leh ṭap thawm ri chel chul hriat theih a ni bawk.

ICU oxygen level chu 2 percent aia a hniam avângin an boruak mamawh angin a pe chhuak zo lova, chuvângin damlo 7 an thih thu an târlang.

Hetiang thil rapthlâk tak mai hi Egypt-ah a vawi 2 thlenna a ni tawh a, Zefta General Hospital ICU ah hetiang thil hi alo thleng tawh bawk a ni.

Vanduaina rapthlâk tak thlen chhanah chuan sawrkar inthlahdah vâng leh eiruk nasat vângah an puh ber a, mahse sawrkar chuan an puhna hi an pawm lo hle.

Egypt Health Minister Hala Zayed chuan damlo vanduaina tâwkte chu oxygen tlâkchham vânga thi an nihloh thu a sawi a, Muslim Brotherhood-te chu thu diklo thehdarhah a puh a ni.

Hospital Director Dr Muhammad Sami Al-Najjar chuan tualchhung chanchinbu hnenah damdawi ina an hmanruate chu a pangngai vek tih sawiin, oxygen tlâkchham vâng an tih chu a pha ve bawk. ICU a damlote chu thihdan pangngai in an thi tih sawiin, an upat vangte leh hunrei tak natna an tawrh tawh vâng niin a sawi bawk.

Governor Dr Mamdouh Gorab chuan ICU ward a awm zawng zawng ni lovin, mi 4 chiah an thi tih a sawi a, damdawi ina security guard chu tlawhtu (visitor) in video a la tûr a ven loh avângin hrem anih tur thu a sawi. Video pholangtu nutei Fatima Al-Sayed Mohamed Ibrahim, kum 66 mi chu damdawiina enkawl lai mêk a ni ve bawk.

Video ah nurse pakhat PPE a inthuam vek chu chauh hmel leh mangan hmel takin chhuatah a ṭhu lai hmuh a ni a, an târlan dân chuan harsatna tawh laia hna a thawhloh avângin pawisa chawitir anih thu an sawi.

Sawiseltute chuan mihring nunna tam tak chân anih hnuah chauh damdawi in chuan oxygen an dawng ve chauh tih an sawi bawk a ni.

LEAVE A REPLY

Please enter your comment!
Please enter your name here