Kum 16 a upa Louise Smith nutei (aunt) pasal Shane Mays chuan tleirâwl a thah avângin jail a dah a ni a, tleirâwl hi a bo aṭanga ni 13 hnuah a ruang an hmu ve chauh a ni.
Shane Mays chu kum 16 a upa Louise Smith a thah avângin, kum 25 chhung jail a tâng turin Winchester Crown Court chuan thiamloh a chantîr tih hriat a ni.
A chungchâng an ngaihtuah ni 1-naah, Shane Mays chuan Louise Smith thih dân chungchangah engmah hriat a neih loh thu a sawi zet a, a hnuah a that tih a inpuang leh tih an sawi.
Jurors, Winchester Crown Court chuan tleirâwl kum 16 thah a nih dân chungchâng a ngaihtuah chhung zawngin thu hriat nuamlo tak tak ngaihthlâk a ni a, Louise Smith khabe ruh chu a lu ruh aṭangin a thlawn niin an sawi.
Mays chuan Louise Smith chu mipat-hmeichhiatna hmanpui tura a nawrluihna lamah rapthlâk taka khawihah puh ani a, court chuan thiamloh a chantir ta a ni.
Tleirâwl taksa chu tihchhiat tumin, a taksa chungah mei a tuah tih an hre chhuak bawk a ni.
Louise chu kumin May 8 khân chin hriat lohin a bo a, a ruang chu ramhnuai Havant Thicket, Hamsphire-ah May 21 khân an hmu ta a ni. A taksa te chu nasa taka ṭhensawm a ni a, a khabe ruh pawh a taksa aṭangin a awm hrang a ni.
CCTV footage aṭanga a lan dânin, May 7 hi Louise Smith a damlaia an hmuh hnuhnun ber ni a nia, hemi ni hian a patea nen dawr a thil an lei lai pawh hmuh an ni.
Roreltute chuan darkar 2 leh Minutes 15 ah Mays-a’n Louise-i a thah dân chu an hrechhuak a, an thu rêl an chhiarchhuah lâi chuan a pate chuan pawi tihna hmel pawh a pu lo niin an sawi.
