Colorado pa pakhat chuan kâr hmasa khân Washington D.C ah ralthuam leh silai mu sang chuang kengin House Speaker Nancy Pelosi thah tumin a kal tih hriat a ni a, nimin Court chuan bail lova hren rih tûrin thupêk an tichhuak a ni.
Cleveland Meredith chu thil hlauhawm tak tih tumah te, dân phal lohva silai kawlah te leh dân kalh zawnga silai mu tam tak neih thubuai siamsak a ni a, a chungchâng ngaihtuah anih hma chu hrên anih tûr thu prosecutors-te’n an sawi.
Meredith chuan January 6 a US Capitol a Trump ṭantute thinrimin, inthlan result tidanglam tûra buaina an siam lâi khân, a truck chu an ram khawpui lam panin a khalh chhuak tih Washington a thubuai an thehluhah chuan an târlang.
Meredith chuan silaimu 2500 kahchhuah theih tûr chu a khâwm a, a text message ah chuan thinrim takin khawpui a thlen veleh Nancy Pelosi leh DC Mayor Muriel Bowser thah a duh thu a sawi tih thubuai an thehluhah chuan an ziak tel bawk.
Meredith chuan khawpui chu Capitol aṭanga mipui an hnawh bo hnuah a thleng ve a, tumah a kah hmain an man hman tih court documents chuan a târlang.
