January 2016 kum khân Nigeria, Eket ah mipa naupang kum 3 mi chu kawngsirah a nu leh pate’n an paih tih hriat a ni. A hriselna a that loh avâng leh a pianphung a danglam em avangin a nu leh pate’n ramhuai naupangah ngaiin an paih tih an sawi.
Naupang kum 3 mi lek chu chawmtu nei lovin amahin kawngpuiah a vakvai a, hetianga lainatawm taka a vahvaih lai hian Anja Ringgren Lovén in a lo hmu a, a khawngaih em avângin tui leh chhang a pe ta a ni. Anja Ringgren Lovén hi Universal Peace Federation International lama hnathawk lai niin naupang 76 chawm lai a nei nghe nghe.
Kawngsira an chhar mipa naupang chu damdawiinah hruai a ni. “A taksa a cherin natna chi hrang hrang a lo nei a, kar khat chhung chu a dinhmun a chhe hle, a damchhuak dawn nge a thi dawn tiin kan thlir a ni” tiin Anja Ringgren Lovén chuan a sawi.
A pum aṭangin rulhut tam tak an phawrhchhuah sak tih a sawi a, nitin thisen an pek hnu chuan nasa takin a lo danglam ta a ni. Tûnah chuan kum 7 a tling ve ta reng maia, naupang duhawm zet a lo ni ta a ni. An naupang chhar hi a hmingah Hope an vuah a, vawiin ni thleng hian a nu leh pa leh chhungkhat lainate an la chhuichhuak thei rih lo tih an sawi.
Hope chuan a naupan lai thlalak chu en fo in a nuih a za thei hle tih an sawi. Sikul kal a taima em em a, lem ziah pawh a peih hle. A milem ziahte pawh an hralhsak ṭhin tih Anja Ringgren Lovén chuan a sawi. Nigeria ramah hian ramhuai bia an tamin naupang vâkvai leh enkawltu ṭha neilo an tam hle tih an sawi a ni.
