Mary Ann Regacho kum 17, Nueva Ecija, Phillipines ami chu kum hmasa khân a hmaiah arngeng lo awmin chu chu a vung ta vak mai a, a hmel pawh hriattheihloh khawpin a lan dan a danglam zo tih an sawi.
Atirah chuan a la thutak lutuk lova, kâr tam a liam hnu pawhin, kum 16 anih laia fapa a neihnaah a hormone lama harsatna a awm vangah angai mai tih a sawi.
Mahse, a bawl chu a hmet sâwr a, ni a liam hnu reivakloah chuan na a ti ṭan ta a, a hmaiah chuan a lo darh tan ta a ni.
Mary chuan a hmai chu, “Balloon hampuar ang mai a ni” tiin a sawi.
Tunah chuan a vung hian a hmai a tuam zo ṭep tawh a, a mit sir thlenga a khuh avângin a khawhmuhna pawh a nghawng phak tawh a ni.
Nu naupang tak fa pakhat nei tawh chuan, in lamah ramhnim damdawi hmangin inenkawl dam a tum a mahse, a hlawhtling ta chuang lo a ni.
Tunah hian, a hnar ngûl, a biang leh a chal velah a darh mek thu a sawilang bawk.
Mary chuan, “Arngeng satliah emaw ka ti mai a, mahse, a na lutuk a zânah pawh ka muhil thei lo. Tihdam tumin ka bei nasa hle a mahse, engmah lo mai a ni. Tunah chuan, ka hmai hi a pangngai thei ngai dawn tawh lo niin ka hria” tiin a sawi nghe nghe.
A pasal Albert Sales chuan sum lakluhna nghet nei lovin, an ṭhenawmte huanah a chângin a inhlawh ṭhin a, in enkawlna turin damdawi pawh a lei thei lo a ni.
Kum khat dâwn lai natna hrehawm tak a tawrh hnuin damdawiinah in entir tûrin a kal ve ta a. Mahse, an bial chhunga damdawiin chuan a natna mak tak mai enkawlna tur hmanrua mumal an lo neihloh avângin Mary chu damdawiin lian zawkah an sawn leh ta a ni.
Damdawiina awm man an pek theihloh avângin, a pasal chu a lungngai hle a, ṭanpuitu samari mi ṭha a zawng tawp mai a ni.
An chhungkuaa video an siamah Albert chuan, “Mi ngilnei tak takte u, ka nupui damdawiina ka hruai theihnan in ṭanpuina ka dil a che u. Kei leh pasal leh kan fapa kum 1 mi ei khawp chauh ka thawkchhuak si a, a damdawi inenkawlna tûr sum ka nei zo lo a ni” tiin a sawi a ni.
(VIDEO)
