Peru court chuan hmeichhia party naa kekawrte sen ha chu pawngsual theih an ni lo, a chhan chu a thil hakin inpawl aduh a ni tih a entir tiin a puang rup mai.
The South Zone Transitory Supraprovincial Collegiate Criminal Court chuan pawngsual case chungchang a rel naah, thubuai theh luttu in kekawrte sen a hak chuan mipat-hmeichhiatna hmang turin a hek pa hmaah inpeih sa tihna a ni a ti.
Roreltu (Judge) chuan a tuartu chu a zak lova, a duh ang tak chu a hmu zawk a ni, a kekawrte hak tura a thlanin a lantir a ni tiin a hekpa zawk chu thiam a chantir a ni.
October 29 a Ica khawpuia Court thutlukna chuan Peru ram chu meikang ang maiin mipuite chu an sa phat mai a, hmeichhe tamtak chu khawlaiah chhuak khawmin an lungawilohna (protest) an lantir a- a thenin an ke lamah kekawrte sen an ha hlawm a ni.
Kum 2019 January thla tawp lama case an thehluh tawh chu, official documents ah ziahluh alo ni lo a ni.
Amaherawhchu, Peruvian media chuan thil tisualtu hi kum 22 mi niin an sawi a, a tuartu ahming an ziah telloh erawh hi kum 20 mi niin an ziak bawk.
Tualchhung chanchinbu sawidan chuan, hmeichhia chuan thil tisualtu a puh (accused) nen party naa an kal laiin nikhaw hre lovin a awm a, chupa chuan sawrkar lehkha pawimawh lampui turin alo sawm a ni.
A tuk khua alo var chuan thilsual titu a puh (accused) khumah chuan saruak vekin a lo mu a ni.
Thil tisuala puh chuan an puhna chu, hmeichhia in achunga ‘phuba’ lak a duh vangah a puh let a ni.
Judge Ronald Anayhuaman, Diana Jurado Espino leh Lucy Castro Chacaltana chuan thubuai theh luttu chuan a insawi dik lo tiin an hnial thla a, hmeichhia chuan mipat-hmeichhiatna hman an duh hunah kekawrte sen an ha thin an ti a ni.
Lungawilohna (protest) hi Peru khawpui Lima ah pawh huaihawt a ni.
Lungawilohna lantir tute chuan a tuartu an dinpui zia lantir nan, mi tam takin kekawrte sen chu an ke lamah an pawt thla a ni.
Thenkhat chuan puanzara thil ziakin, ‘Roreltu (Judge) te u ngaithla rawh u, pawngsualtute thiamchantir nan kan kekawrte hmang suh u’ tiin.
A tuartu nu kekawrte chungchangah pawh, ‘Lace chu puan thui khawm a ni mai, thil tha lo entirna a ni lo’ tiin an tar bawk.
Thenkhat chuan roreltu (Judge) te hmel an tar bawk a ni.
Peru’s Public Ministry chuan October 30, Court in ro arel zawh hnuah thuchhuah siamin, an rorel chu sût let a, Court dang a chai turin an ngen a ni.
The Control Office of Judiciary (OCMA) chuan thawhtanah an mi rinhlelh Judge ten diklo taka ro an relsak chu endik in, hrem anih dawn leh dawnloh an chhui chiang dawn a ni.
Peru’s Ministry of Women chuan, ‘Court thutlukna chu an hnawl bur tih an sawi a, harsatna tuartu zawk nasa lehzuala tawrhbelhtirna hi kan pawm thei lo’ an ti a ni.
‘Hmeichhia te chunga hleilenna leh pawngsualna nuai bo anih theihdan awmchhun chu, mipa leh hmeichhiate hleih nei miah lova Dân kengkawhtuten ro an rel chauhin a ni ang’ tiin an sawi bawk.
Peru ah chuan an lungawilohna chu hla in an auchhuahpui a, he hla hmang hian Turkey, France, Spain, United Kingdom leh Latin America ten hmeichhiate chunga hleilenna an duhlohzia an lantir ve bawk a ni.
