California-ah pa pakhat chuan a kekawr hâk lai phelhin chênna in nei lo hnena a pek lai video chu a viral chiam mai a, TikTok ah 1.6 million chuangin an en tih hriat a ni.
Daniel Richards leh a nupui chu zân lama ei tûr vêl lam tûrin an chhuak a, chutah chuan chênna in nei lo David an hmu a. Chupa chuan December khaw vawt lutuk maiah kekawr bul bâk a ha lo tih a hmuh chuan engemaw tak tih angai tih a hre chiang hle a ni.
Unilad ah Daniel nupui chuan tihian a ziak a, “Motor chhûnga kan luh hnuah ka pasal chuan, mipa kekawr hak tûr leh puansin tûr pawh nei lova kawngsir emaw mi bathlar a mu ringawt tûr chu a tlân pelh theihloh thu min hrilh a.
“Reilotê inbiakna kan nei a, dâwr a kal tur chuan kan tlai tawh tih ka sawi laiin, ka pasal chuan ka hriatloh hlânah car aṭanga chhuakin David lam chu a pan ta a. Chutah chuan ka phone phawrhin ka record ta a ni” tiin.
Mi tamtak chuan a thiltih avângin Daniel chu an fak nasa hle a, mi ṭhenkhat ve thung chuan an nupa in social media-a intheh lâr nân chênna in nei lo chu hman an tum tiin an sawi ve bawk.
Nimahsela, Daniel nupui chuan chhuang tak maiin a chhânglêt a, “Lâr khelh vangin chênna in nei lo hi record ka tum miahlo. Ka tum chhan chu thianghlim takin a ni zâwk, ka pasal nên kum 10 chuang kan chêng dûn tawh a, thilṭha ti tur leh thutlûkna dik siam turin rei a rial ngai lo” tiin a sawi.
Chutih lai chuan, Daniel chuan post viral ta chhunzawm nân follow-up video a upload a, tihian sawiin, “Ka nupui khân alo record ang tih ngaihna rêng rêng ka hre lo, car a ka luh hnuah min entîr a ka hre ve ta chauh a ni. Atîr berah video upload tûra min hmintu a ni bawk. Hetiang thil hi ka ti nasa tawh a, ka record ngai lo thung.
“March thla aṭang khân ka hna ka chân a, chuvângin midang thil va pêkte hi ka tân a harsa tawh hle a, kekawr mai mai annih pawhin mahse tu emaw tâna thilṭha ti tûrin mihringa ngilneihna a awm ve mai vâng zawk a ni” tiin.
(VIDEO)
