Ui fing leh huaisen tak mai chuan Russian damdawiin (hospice) a kangmei chhuakah rang tak maiin building chhungah a lut a, alarm chu ti riin damlo mi 4 a chhanchhuak a ni.
Ui rai lai ‘Matilda’ tia an koh chu Russian Leningrad huamchhunga kângmei chhuakah carbon monoxide khu vângin a kâng nasa hle mai a, tunah erawh a tha chho mek zêl a ni.
Private damdawiina damlo 4 te chu chhanchhuaktu pawlte koh annih hnuah kangmei lak atangin him taka lâkchhuah an ni.
Mahse ui Matilda erawh a hnu deuhah mi tlawmngai Elena Kalinina leh Alexander Tsinkevich ten chhanchhuak in, hliam na tak a tuar a ni.
Ui rai mêk chu ṭap in na a ti lutuk chu a khûr hial a mahse chhel takin a tuarchhuak a ni tih an tarlang.
Tunah hian a kan nasat lutuk avângin St. Petersburg a Vasilek shelter-ah ramsa enkawltu pawlten tihdam tumin an enkawl mêk a ni.
‘Matilda hmai, nghawng leh a pum vel chu a kâng nasa hle’ tih a enkawltu ten an tarlang a ni.
Matilda chu fertility specialist in rei tak a en a, a note an that leh thatlohte uluk takin a zirchiang a ni.
A note te chu an dam vek thu leh an ṭhan chhoh zel thu a sawi a. A note awmzat erawh sawi theih a ni rih lo, achhanchu amah hi ui lian tak a ni si a tiin a sawi a ni.
Mahse Matilda ‘Motyo’ tia hriat hi a hnute hmur a kan nasat avângin a note te chu hnute a pe thei dâwn lo a ni.
Kângmei a chhuah hnuah hian damdawiin neitu chuan a ui hi a kan nasat avângin ala enkawl thei dawn lo tih an tarlang bawk a ni.
