KALABUGARI: Mipa unau 3-te chuan an nu leh pate tân ui nei miah lovin, an mahni chawimawi nân leh hriatreng nân temple an dinsak a, an lim an dah bawk. Niragudi thingtlâng khua, Aland taluk, Karnataka, Kalabugari district a temple chu Thawhṭanni khân an hawng ṭan tih hriat a ni.
Lo neitu Vishwanath Patre chu kum 3 liamta khân a boral tawh a, a nupui Laxmibai Patre pawh thla 6 liamta khân a boral ve bawk. An fate– gram panchayat member Jagannath, 45, Panchayat Development Officer Dasharath, 42, leh First Division Assistant Dhananjay, 38-te chuan an nu leh pate chawimawi nan leh hriatreng nan temple lian vak lo an din a, an nu leh pa biak theihna tûrin an lim an dah bawk.
Unau mipa 3-te chuan temple sak nân chêng nuai 2 an hmang tih an sawi a. Temple hawn ni hian tualchhung mite pawh an tel a, an nu leh pate chuan an fate chu khua leh tui ṭha tak ni tûrin zirtirna an lo pe thin a ni. Unau 3 ten an nu leh pa an chawimawi dan leh khua leh tui tha nih tuma an beihnate chu midang tan a entawntlâk tak zet a ni.
An unau zînga upa ber Jagannath chu an khuaah a awm chawt a, an ram neihte leh a nu leh pate enkawlin a hun a hmang tih an sawi. Pawl 10 thleng chauh lehkha a zir a, a nau 2-te chu zirna sâng zâwk beiin sawrkar hna ṭha tak thawk thei tûrin an zir chhunzawm thung a ni. An unau 3 hian nupui fanau neiin chhungkua an din mêk tih an târlang bawk.
An nu leh pa boral hnuah an sum thawh khâwmin, anmahni biak theihna tûr temple chu an din ta a ni.
