State dang ang bawkin Uttar Pradesh-ah pawh COVID-19 curfew puan a nia, hetih lai hian rawlthar kum 17 mi chu COVID Curfew dan bawhchhia puh anih hnuin Police-ten an vaw zuia, vanduaithlak takin he rawlthar hi a thi tih hriat a ni.
Rawlthar Mohammad Faisal kum 17 mi chuan local market ah danina a phal chin pelin tlailam Dar 3 thleng thlaihnah a hralha, hetih lai hian Police hnathawk Vijay Chowdhary leh homegaurd Satya Pradesh chuan Mohammad Faisal chu COVID-19 Curfew rules bawhchhiaa puhin, hmawlhin an vaw chiam tih Mohammad pa Mohammad Islam chuan a sawi.
He thil duhawm lo tak hi Uttar Pradesh, Bhatpuri huamchhung Bangarmau area a thleng niin, rawlthar kum 17 mi Faisal hian thlaihnah a hralh thin a ni.
Thihna tuartu Faisal chhungte sawidanin, an fapa chu Police 2 te hian theih tawpa an vuak hnuah pawh Police Station lamah an hruai zuia, station an thlenpui hnu hian a dinhmun chu chhe zualin nikhawhreloin a awm zui ta a ni.
Tianga biak theih a nih loh hnu hian Bangarmau Community Health Centre-ah dah luh leh niin, a chhungte chu an fapa chanchin an hriat chuan health centre lam an pan nghala a hmun an thlen chuan a lo thi tawh a ni. Police hna chelh lai mi 2 Vijay Chowdhary leh Satya Pradesh-te chu an hna atanga chawlhtir an ni.
