“The Simpsons” writer leh producer, vawi 10 zet Primetime Emmy Award nominated lo ni tawh Marc Wilmore chu coronavirus natna avângin kum 57 mi niin a boral.
“Ka unaupa duhtak, Marc Edward Wilmore, chu nizân khân Covid-19 leh a taksaa natna kum tam tak alo tawrhte avângin a boral”, tih Wilmore a unaupa leh a comedian pui ni bawk Larry Wilmore chuan Pathianni (Sunday) khân a tweeted a, “Ka unaupa chu mi ngilnei ber, nunnem ber, nuihzatthlâk ber, sakeibaknei vântirhkoh ang mai a ni. Ka nau ka hmangaih che” tiin a sawi bawk.
Cal Poly Pomona aṭanga a graduate hnuah, Wilmore chuan ’90s chho aṭangin a eizawnna atân thu ziah a luhchilh ṭan a– sketch comedy show “In Living Color” ah lem a chang ve bawk. A thuziak chu a vawikhatna atân Emmy Award nomination zîngah a lang nghe nghe. “In Living Color” hnuah “The Tonight Show Starring Jay Leno,” tih a ziak bawk a, chumai bâkah a unaupa Larry’s stop-motion sitcom “The PJs” tih a ziak bawk.
Wilmore chu “The Simpsons,” tân co-executive producer leh writer a ni nghal a, chumi piahah animated series “F Is For Family,” pawh a khawih tel bawk. A aw pawh a châng chuan character ṭhenkhatah a lang tih IMDb chuan a târlang.
Larry-a’n a unaupa boral thu a puanchhuah hnuah, comedian leh writer tam takte’n mi ngilnei leh fiamthu thiam chu an uizia thu an sawi a ni.