Kan hriat theuh tawh angin Cristiano Ronaldo chu International break laiin Covid-19 a kai tih hmuhchhuah a ni a. A khelhpuite atangin ni 19 a awmhrang tawh a. Mahse tunah chuan a dam chiang ta tih Juventus lam chuan an tarlang.
Cristiano Ronaldo chu Covid-19 test vawi-3 a neihah a positive vek a, tunah chuan a negative ta e.
Ronaldo kha International breakah a ram Portugal tan a khelh laiin a Covid-19 a positive tih hriatchhuah tan a ni a. Turin-ah inkhunghrang turin a let leh ta a ni.
A thiante atangin ni 19 a awm hrang tawh a, a thiampuipa Lionel Messi nen an intawh leh theihna hun remchang, Juventus leh Barcelona khelh tumin a tel thei ta lo a nih kha.
Thuchhuahah chuan, “Cristiano Ronaldo chuan a natna Covid-19 a endik(swab) tir leh a. Chu endikna chuan a negative tih a tarlang. Chuvang chuan, he player hi ni 19 hnuah adam tawh a, a inah amah chauha khunghran angai tawh lovang” tiin an ziak a ni.
Chutiang anih chuan Ronaldo chu Serie A lamah kir lehin Sundayah Juventus leh Spezia inkhelh hunah a tel ve thei dawn ta tihna a ni.
Dan an siam(protocol)ah chuan inkhel turte chu an khelh hma darkar 24 la awmah an negative ngei tur a ni tih a ni.
Ronaldo chuan a Covid-19 a positive atangin match 4, Portugal tan vawi-1 leh Juventus tan vawi-3 a khel thei lova.
Social media ah Ronaldo chu ina a inkhunghran chhungin a awm mai mai lova, a in la fit reng tih kan hmu a ni.
Post hmasa zawkah khan Italy Sport Minister Spadafora in dan zawm lova a puhna, a chhanlet dan kha kan ziak lang tawh a. La chhiar lo tan a en theih reng e.
