Arsenal chuan Europa League ah Dundalk hnehin an dinhmun an sawhnghet chho zela, Mikel Arteta leh a naute chuan Sunday a Man Utd nen an khelh turah an in buatsaih tan nghal a ni.
Arsenal Boss chuan Manchester United an hmachhawn hun turah hian a team atanga khel turte chu a thlan fel ngei a ngai dawna Europa League a Dundalk an hmachhawn tumin an khelhdan a thlak danglam nuala mahse, tha takin an khel chhunzawm ta tho a ni.
Minute 4 chhungin goal 3 teh meuh an pet lut hmana chung chu an chakna goal a ni nghal bawk. Joe Willock chuan vawikhat ti goalin a khel tha hle a, thlirtute lung a kuai hle. Arsenal team tan ‘Man of the Match’ a hauh zui bawk a ni.
Arsenal team chuan Sunday-ah Old Trafford pan turin an in sawrbing meka, Arteta chu squad chhah tha tak an neih avangin players khelhtir turah a rilru a buai ru hle.
Arteta’n BT Sport hnenah, ‘Squad chhah tha tak mai kan neia, an zavai mai hian khelh theihna hun remchang siamsak vek ka duh a ni. Vawiin an inkhelah ka rin ang takin min ti beidawng lova, an inpeih tih an tilang bawk. Chu chuan player khel tur thlan kawngah rilru an tibuai deuh” tiin a sawi nghe nghe.
Arteta chuan, “A chang chuan quality a pawimawh rualin, an khelh dan tur tactic duan hi a pawimawh hle a, vawiin an khelh dan chuan min ti lawm takzet” a ti.
“Willian chu kar engemawzat chhung chu inhliam vangin a khel thei lova, a lo let leh thei a, a khel pawh hmuh nawmin a tha chho zel ang” tiin Arteta chuan a sawi bawk.
Arteta’n, “Leichester City laka kan tlawm khan na ka ti hle maia mahse, Old Trafford lam panin chak ngei kan tum dawn a ni” tiin a sawi bawk.
Willock chuan Arteta hnuaiah khelhna hun tam zawk chan tumin beih nasat a tum hle a, goal thuntu Willock chuan, “He team tana ka khel thei hi ka lawm a, a tir atanga ka khel thei kha kei leh ka chhungte tan chuan lawmna nasa tak a ni. Team tana goal ka thun thei kha ka lawm hle bawk” tiin a sawi.
“Artetan in a hma aia nasa zawka tan la zual sauh turin min fuiha, a hnuaia khelhna hmun chang zel thei turin leh ka position luahlum tlat turin theihtawp ka chhuah ang” tiin Willock chuan Arteta hnenah a sawi bawk a ni.
