Jonathon Huff, kum 2 pawh la tling lo chu battery a dawlh hnuah a hrawk hrui, a ril leh lung hnûna thisen dâwt puiah te hliam nasa tak a tawrh avângin a boral tih hriat a ni.
Naupangtê chuan button battery a dawlh hnuah, a taksa pêngte kângin thisen a hloh nasa hle a, damdawi lama mithiamte chuan theihtâwp chhuah mahse thla 23 mi chu a hliam tuar lovin a boral tih an târlang.
Jonathon Huff, battery dawlh chu ni 4 ngawt a taksaa a awm chhûngin a hrawk hrui, a ril leh lung hnûna thisen dâwt puite tikângin, thisen tam tak a hloh tîr tih an sawi.
Naupangtê ‘nugget’ tia hriat chu North Carolina, US mi a ni a, December 20 khân a boral tih The Sun chuan a târlang. A nu leh pa hriat lohvin battery zawp thei chu a dawlh tih an sawi.
Dâktawr hnena vawi 2 an kalpui hnuah, mipa naupang chuan thisenin a luak a, nikhaw hre lovin a awm zui ta a ni. Chhanchhuak tûrin theihtâwp chhuah mahse an chhan zo ta lo. A ruang an endikna aṭangin a rila button battery chu ‘key finder remote’ ami a nih thu an sawi.
Button batteries-te chu car chabi khaidiatah te, naupang toys-ah te leh remotes ah te an hmang tlangpui a, naupangte’n an dawlh chuan thihna hial a thlen thei tih an sawi.
Thihna a thlen theih dân chu chil nen a inpawlh chiah khân thil kâng theiah a insiam ta a ni. Hrawkte tikângin internal bleeding a thlen a, mihringte tan damkhawchhuah ngaihna a awm lo a ni ber.
Sawrkar thuneitute chuan naupangte an him theihnân battery te hi fimkhur taka dah tûrin mipuite an chah a, upate’n naupang zawkte hnenah a hlauhawmzia sawi ṭhin turin a ngen ngal bawk. Naupangin battery a dawlh nia rinhlelh an awm chuan 999 ah ambulance koh vat a, anih loh pawhin A&E (Accident and Emergency) ko vat turin an chah bawk a ni.
