Meikhu nasa tak mai chu Serum Institute of India (SII) aṭanga lo chhuak hmuh a ni a, AstraZeneca leh Oxford University te’n an siam Covid-19 vaccine maktaduai tel siamchhuahna hmunpui a ni.
Khawvêla Covid-19 vaccine siamchhuahna lian ber aṭanga kangmei lo chhuak chu hmuh theihin an târlang. Meikhu chu a nasa hle a, a bula awmte chuan mangang takin an thlîr tawp mai a, Kangṭhelh motor 5 a hmunah an thleng nghal tih an sawi.
Kangmei hi Serum Institute of India (SII), Pune khawpui thlang lamah January 21, 2021 khân a chhuak a, tûn dinhmunah mi 5 nunna chân an awm nia hriat a ni.
Kângmei lo chhuahchhan dik tak hi hriatchian ala ni lova, mahse, building sak lai mêk aṭanga inṭan anih an rin thu an sawi.
Pune Mayor Murlidhar Mohol chuan, “Mi 5 boralte chu building saknaa hnathawk mêk an ni. Kângmei chhuahna chhan hi tihchianna neih tûr a ni a, tûna a landân chuan building saknaa welding aṭanga inṭan nia rin a ni” tiin a sawi.
SII CEO, Adar Poonawalla chuan, “Vanduaithlâk takin kângmei chhuakah nunna chân an awm tih kan hria a, thinlung takin an kalsan tâk an chhûngte kan tawrhpui takzet a ni” tiin a sawi a, vaccine siamnaah erawh harsatna a awm phah loh tûr thu a sawi bawk.
SII chuan Oxford University leh AstraZeneca siam Covishield vaccine chu India ram tan leh ram rethei zâwkte tan an siamchhuak a ni.
India chu khawvel pumah coronavirus tuar nasa ber ram zînga mi a ni a, vawiin ni thlengin, Covid-19 vei mi 10.6 million an awm mêk a, thihpui mi 153,000 vêl an awm tawh bawk.
(VIDEO)
