Philadelphia ṭhalai pakhat chu a ui nen kea an kal lâiin rûkrûk tum nia ngaihten a in aṭanga hla lo tê ah an kaphlum tih Police-te leh a chhûngte’n an sawi.
A chhûngte chuan a tuartu chu kum 25 mi, Milan Loncar anih thu an sawi a, a ui duhtak dachshund-Chihuahua mix, Roo nen zân dar 7pm rik hma deuhin an kalchhuak tih an sawi. January 13, Nilaini khân Brewerytown section ah mi 2 rinhlelhte chuan a awmna lam an pan tih the Philadelphia Inquirer chuan a târlang.
A beitute zînga 1 chuan silaiin a tin a, a ipte chu an dap nghal a. Kum 2019 a Temple University Graduate chu a âwmah vawi 1 kah a ni a, a hnuah damdawi inah a boral tih Police-ten an sawi.
Investigators-te chuan January 14 khân CCTV in video a lâk fuh en hrehawm tak chu an pholang ta a ni. An mi rinhlelhte chu thlang lamah (westbound) ke in an tlanbo tih Police-te chuan an sawi bawk.
An mi rinhlelhte man tûrin, an chanchin hrilh thei apiangte hnênah $20,000 pêk an in tiam a ni. Zirtawpni thleng khân tumah man an la nei lo tih police thupuangtu chuan The Post a hrilh.
“He khawvêlah hian mi ngilnei ber a ni ang,” tiin Loncar farnu, Jelena Loncar chuan a sawi a, “Bitum anih leh nihloh chu ka hre lo, mi an rawk dawn anih chuan, ui nen kea kal mai mai chuan engtinnge pawisa tam tham tak chu a neih reng reng ang? Ka hre thiam lo” tiin a sawi bawk.
Loncar chabi leh a cellphone chu thilthlenna hmunah an hmu a, a wallet erawh a inah a kalsan tih a chhungte’n the Inquirer an hrilh.
Loncar nu Lounsberry chuan march thla khian a bialnu nena chêndun an tum thu WPVI hnenah a sawi a, pawisa engmah hmu chuang si lova an tihlum kher chu a hriatthiam theihloh thu a sawi bawk. A bialnu Olivia Gorski chuan, “A ni chu ka ‘soulmate’ tiin a sawi a, a tello chuan ka hmalam hun ka ngaihtuah thiamlo a ni” tia sawiin a ṭap nasa hle a, Loncar nu leh a farnu chuan an hnem a ni.
Zirtawpni zânah a chhûngte leh ṭhiante chu a thihna hmunah kalkhawmin a thlalak an târ a, an cellphone ti êngin rimawi an tiri a, amah hriat reng nân an zai bawk.
Police-te chuan an mi rinhlelhte chu mihang an ni tih an sawi a, pakhat zawk chu cher lam deuh niin semi-automatic silai a keng tih an sawi bawk. Tualthahna chungchanga thilhriat nei chuan detectives-te (215) 686-3334 ah be tûrin an chah bawk a ni.
(VIDEO)
