President Trump chuan Twitter ah followers 88.7 million a nei tling tawh a, Twitter chuan a account chu an tihtâwp sak ta hmiah mai a ni. President Trump leh Twitter hian inhnial kalhna an lo nei fo tawh ṭhin a, January 6 a Trump ṭantute’n Capitol a buaina an tihchhuah hnuah Zirtawp zân khan a account chu an tihtâwpsak hlen ta a ni. Facebook leh Instagram pawhin a account chu an tihtâwpsak ve bawk a, January 20 hma zawng chu tihtâwpsak an tum thu an târlang bawk.
President Trump chu Social Media Platform Facebook leh Twitter in an block hnuah mipui hman theih turin Social Media Platform dang siam a tum tih hriat a ni.
Donald Trump hi mi hausa tak anih avângin Social Media Platform chu awlsam tê a asiam theih mai rin a ni. Mipuite hnenah Twitter chu zalen taka duh duh sawi theihna a ni lo tih sawiin, lo ngaichâng turin a chah a ni. A siam tûr Social Media Platform hming chu a la sawilang lo thung. Amah ṭantu pawlte chuan an nghakhlel tawh hle.
Zirtawpni khân Twitter chuan Trump tana rinawm tak 2– former national security adviser Michael Flynn leh attorney Sidney Powell te account chu a tihtâwpsak hlen bawk. Steve Banon ‘War Room’ podcast YouTube account chu YouTube chuan an dân siam palzût a puhin an tihtâwpsak bawk a, vote tih chingpen chungchangah thu belhchian dawl lo phochhuak tawh lo tura warning anih hnuah a tihluih avângin an titâwp tih an târlang.
