Irwin Rivera, UFC bantamweight fighter ‘The Beast’ tia hriat lâr chu a farnu 2 a vih avângin tualthat tuma puhin man a ni tih an târlang.
Rivera, 31, chu Ningani khân Palm Beach, Florida ah man a ni a, thu zawhfiah tura hruai a ni.
Rivera farnu naupang zâwk kum 22 mi chu an in bul lawk kawng sirah thisen kai hnuangin a hnungah leh, a lu leh bânah te hliam tuarin an hmu tih police-ten an sawi. Police-te hnenah vih anih thu leh a unaunu pakhat pawh inchhungah beih a tâwk tih a hrilh bawk.
Rivera farnu kum 33 mi chu inchhûngah thisen kai hnuangin a hnung, a hmai, a bân leh kutah te hliam tuarin an hmu bawk a ni.
A farnu zînga pakhat chuan police-te hnenah, a unaupa Rivera bulah chengin a room pakhat zawkah an awm a, zanlaiah rawn kaitho in chemte in a vit hlawm tih a sawi.
Hliam na tak an tuar nachungin, hmeichhia 2-te chuan nunna an chân lova, damdawi inah hruai an ni.
Daytona Beach Police officers-te chuan an man a, an kawmnaah a farnu 2-te chu brass-knuckle chemte in a vit tih a sawi. Rivera chuan a farnu 2 -te chu a that tih a sawi a, a aia thuneitu in ti tûra a hrilh angin a tum rêng vânga ti anih thu a sawi bawk.
Rivera chu Florida dân hnuaiah thiamloh chantîr anih chuan damchhung lungin tântîr emaw thihna khawp hial pawh tâwk thei a nih thu an târlang.
Rivera chu kum 2020-ah khan UFC-ah vawi 3 a insual a, Ali AlQaisi a hneh a, Giga Chikadzie leh Andre Ewell lakah a tlâwm thung a ni. UFC thuneitute chuan he thil thlengah hian MMA Fighting ah thuchhuah siam ve nghalin Rivera chuan rilru lamah chianlohna a neih thu an târlang ve bawk.
