Puithiam leh a zirtir 2-te chu sakhaw biakna in bulah hmeichhia kum 50 mi thattua puh an ni. Puithiam chuan he hmeichhia hi tuichhunchhuahah a tla a, an chhanchuak niin a sawi ve thung.

Puithiam leh a zirtir 2-te chu hmeichhia kum 50 mi pawngsual rawn hnua tihlumtua puh an nia, an 3 hian Uttar Pradesh, India a thil thleng rapthlâk tak kaihhnawiah man an ni tih an târlang.

Hmeichhe ruang chu khum ah an zalh a, a taksa chu thisen kai puan engin an khuh a, thlalâka a lan dân chuan a ke chu a tliak tih a hriat theih a ni.

Vanduaina tawk ta hmeichhia fapa chuan thilthleng rapthlâk tak mai chu tualchhung chanchinbu mite hnênah a sawi a, “Motorin an phur a, hetih lai hian a boral tawh a ni. Puithiam leh midang chuan kawngkaah an hnutchhiah a, hmanhmawh takin an kal leh nghal a ni. Pathianni tlai dar 5pm vêl khân in a chhuahsan a, zân dar 11:30pm vêlah mipa 3-te chuan an lo dah lêt” niin an sawi.

A ruang an endikna aṭanga alan dânin a zahmawhah hliam a tuar tih NDTV chuan an târlang bawk.

“Post-mortem report-ah chuan a zahmawhah hliam tenau a tuar a, a thler bâkah a ke pakhat chu a tliak bawk a ni. A thisen a chhuak nasa hle a, chuvângin a nunna a chân phah ta a ni. A landân ah chuan pawngsual ni ngeiin kan hria a ni”, tiin Dr Yashpal Singh, Chief Medical Officer, Budaun chuan a sawi.

Budaun police chief Sankalp Sharma chuan tualchhung police-te chu an inthlahdah avângin an chungah hremna pêk an nih tur thu a sawi a, local police station in charge chu he buaina a chinfeldan chungchangah a dawngdah êm avangin a chawlhtîr tih a sawi bawk.

Puithiam chuan Video ah hmeichhia chu tuichhunchhuahah a tlâ a, a zirtir 2-te nên an chhanchhuak tih a sawi a, an lâkchhuah laiin ala dam a, in an va dah thlengin a la dam tiin a ṭang tlat thung a ni.

Chhuichianna neih ṭan a ni tawh a, National Commission for Women (NCW) chief Rekha Sharma chuan, “He thil hi kan ngaihthah mai mai dawn lo, kan member zînga pakhat chuan thil thlenchhan dik tak chhuichiang turin an chhungkua leh police-te a hmu dâwn a, thil nihna dik tak hailan in a awm ang” tiin a sawi tih news agency ANI chuan a târlang.

LEAVE A REPLY

Please enter your comment!
Please enter your name here