Minute 60 chhûngin chawhmeh engzatnge i siam theih ve le? A tam berah 4-5 vel a ni maithei. Mahse, hmeichhe naupang pakhat chuan minute 58 chhûngin chawhmeh chi 48 zet a siam thei tih hriat niin, world record a siam zuia a hming chu UNICO ‘Book of World Records’ ah a chuang vah tawh dawn a ni.
SN Lakshmi Sai Sri chu Chennai a chêng a ni a, he mêl lung ropui tak mai ti thei tûrin a nu chuan lockdown chhûngin eirawngbawl a zirtir ṭhin a ni. Ei in siam chu a nuam tih zâwng tak a lo ni bawk nen a lar phah der. “Kanu hnen aṭangin eirawngbawl dân ka zir a. He mêl lung pawimawh tak phuna tun hun ka thleng thei hi ka hlim em em a ni” tiin ANI a hrilh.
Hmânni lawk khân news kan tihchhuahah, Ernakulam, Kerala a chêng hmeichhe naupang kum 10 mi Saani M Prajit chuan darkar 1 chhungin chawhmeh chi 30 siamin world record a siam tih kan tarlang tawh a. He thil hian Lakshmi pa chu a hnehin phûrna a siam nasa hle a, a fanu chu Prajit record khûm turin a fuih ta a ni tiin an sawi.
“Ka pasal hnenah eirawngbawl nuam a tihzia ka sawipui a, a ni chuan choka ei tûr siamin world record kan khûm tîr tûr a ni tiin thurâwn min pe a. Chu chu a ni ngaihtuahna kan neih dan chu” tiin Lakshmi nu N Kalaimagal chuan a sawi.
ANI chuan Lakshmii’n India chawimawia World Record a siam dân chanchin a târlan hnuah, a chanchin chu a viral ta chiam a, mite hnen aṭangin hmangaihna leh fakna thu a dawng nasa hle a ni.
