Kum 15 chhûng an inneih hnuah fa an neih theihloh avângin, UP thingtlâng khuaa lo neitute nupa chuan bâwng note chu an fa atâna lâk an rêl a, a hmingah ‘Laltu baba’ an vuah a ni.
Vijaypal leh Rajeshwari Devi te nupa chuan mi 500 chuang sawmin, Hindu ho in an tih ngei ngei ṭhin, an fate lu an meh vawikhatna ‘mundan’ chu Laltu baba tân Nilaini khân an buatsaihsak a ni.
Nupate chuan Laltu baba chu Laltu Ghat, Gomti lui kamah hruaiin lawmna hun chu an hmang a. Puithiam chuan, Bâwng note leh a nu leh pate chu mal asâwm bawk.
An thil serh chu an hmang ṭan ta a, an khuaa mi hrang hrang aṭangin thilpêk an dawng bawk.
“Laltu hi ka fapa ang maiin ka enkawl thin a, he bâwng note hi a piantirh aṭangin kan in zawm em em a ni. Laltu kan hmangaihna hi a dik a, tâwp ni a nei lo”, tiin Vijaypal chuan TOI a hrilh.
“Mundan tel tûra sawmna kan hmuh chuan mak kan ti hle a. Mi tamtak an tel a, kan zavai maiin an nupa leh bâwng note te chu kan lawmpui takzet”, tiin an khaw mi Ratnesh Mishra chuan a sawi.
A nu leh pa thih hnuah, Vijaypal chu amah chauhin inah a chêng a, a nau hmeichhia 2 te paw’n pasal an neihsan tawh bawk.
Vijaypal chuan apa in alo enkawl ṭhin bâwngpui, Laltu nu nên an in pawh thu a sawi a. Bâwngpui a thih hnuah, a note chauh a hnutchhiah tih a sawi. Tichuan, a fa atâna la turin rilru an siamfel ta tih a sawi bawk.
“Bâwngpui chu kan nu anga kan pawm thei anih chuan, a note chu fapa atân engah nge kan pawm theihloh bik ang”, tiin Vijaypal chuan a sawi zui bawk.
