MacKenzie Scott— Amazon boss Jeff Bezos nupui hlui— chuan thla 4 liamta chhûngin Coronavirus buaina avângin American mi harsa zâwkte hnenah ṭanpuina $4.2 billion dâwn a pe chhuak a ni.
Thawhlehni a blog spot ah, khawvel hmeichhia zînga hausa ber 3-na chuan a pawisa chu ramchhung Organisations 384 ah a semchhuak tih a sawi a, food banks, social services programs, civil rights groups, colleges leh universities te pawh an tel a ni.
Scott, 50, chuan hripui lêng vânga harsatna tâwkte tân July thlaah $1.7 billion dâwn lai mai a pek tûr thu a puan chu a bawhzui nghal a. A thilpêk hnuhnung ber nen chuan kumin chhûngin $5.8 billion vêl lai mai a pe chhuak tawh a ni.
“He hripui hian Americante nunah chhiatna nasa tak a thlen mêk a ni” tiin Scott chuan a blog post ah a sawi a, Billionaire te leh ama sum leh pai ngei pawh a danglam nasa hle tih a sawi bawk.
Scott chuan a team zinga advisers-te’n Organisations 6500 aṭangin an thilpêk dawng tûrte chu an pawisa mamawh tâwk tûr ang ṭheuhin an thlang chhuak tih a sawi a. Advisers ho chuan charities aṭangin emails za tam tak leh phone interview leh pages sang tam tak data endikna hmangin uluk takin an zirchiang tih a sawi bawk.
Thilpêk chu pêk lâwk an ni dâwn a, Organisations te chuan ṭha an tih angin an sem thei dawn a ni tiin Scott chuan a sawi.
“Scott teamte biakna rawn chhânglêt tute chuan an mimal chanchinte chu mittui nen an sawi fo ṭhin” tih a sawi a, “An chanchin leh mittuite chuan kei leh ka teamte min vel ṭap fo” tiin a sawi bawk.
