Naupang hmanga sumdawnna hi Rajasthan chhim lamah a hluar hle a. Tribal huamchhung heng Udaipur, Banswara, Dungarpur leh Pratapgarh district a chengte chuan an retheih avângte, thiamna leh hna an neihloh avângin an fate chu an dahkham mai ṭhin a ni.

Police-te leh NGOs ten an do nachungin, Udaipur a government sikul zirtirtu Durga Ram Muwal chuan hetiang dinhmun a ding naupangte chhanchhuah hna thawk turin rilru a siam fel ta a ni. The New Indian Express in a târlan dân chuan, ‘informers’ network a din a, Gujarat, Maharashtra leh Andhra Pradesh a naupangte chhawr luih an ni ṭhin chu chhanchhuah dan kawng a dap ṭan ta a ni. Kum 8 kalta chhûng khân Durga chuan naupang 40 chuang a chhanchhuak hman tawh a ni.

Durga chu Nagaur district aṭanga lo kal a ni a, Udaipur -ah kum 10 chuang zirtirtu hna a thawk tawh a ni. Udaipur aṭanga km 60 a hla Pargiyapada thingtlâng khuaah government sikul zirtirtu hna a thawh laiin naupangte chuan rinloh tak maiin sikul kal an tâwpsan ṭhin tih chu hriain a thlithlai ta a, engthilnge thleng ṭhin tih chu a hriat phah ta a ni.

“He lai hmun hi Gujarat ramri bula awm a ni a, ‘dalals’ (mi vantlâng) te chuan kan sikul naupangte chu Gujarat leh Andhra Pradesh ah hnathawk turin an la ṭhin tih min hrilh ta a ni. Naupangte chu sawithamloh khawpa tlemin ni 1 ah ₹50 hlawhin darkar 18 chhung hna an thawhtîr ṭhin a, thil dang pawh an thawhtîr fo ṭhin a ni” tiin Durga chuan a sawi.

Hmeichhe naupang 1 chu thla a liam hnuah a haw ta a, a awmdân a hmuh chuan mak tihna in a khat a ni. “A taksa pawh a khawlo zâwngin an chhawr tih ka hmuh hnuah chuan, heng naupang ho tan hian thil engemaw tak ti turin rilru ka siam fel ta a ni” tiin a sawi.

Awareness campaign in bul a ṭan a, tribalte chu he thil bei lêt turin a fuih hlawm a ni.

“Police-te chu thawktu indaihlohna avângin thubuai an thehluhte pawh an ngaihthah phah fo ṭhin a. Chuvângin, NGOs te nen ṭangrualin he lai bial a child helpline kal tlangin collector te chu a be ṭhin a ni. Hetiang anga kan ṭanhona leh mipui aṭanga nawrna avângin, naupang hrehawm leh hlauhawma awmte chu kan chhanchhuah theih phah ta a ni” tiin a sawilang bawk.

A hnathawh chu a ropui takzet a, chulai vela mite chuan an zah hle. Naupang tihluihna tuartute tân chuan chhandamtu tih theih hial a ni ang. Hepa hian India ram lo awm zel tûr tih hmasâwn nân thil ṭha tak a ti a ni.

LEAVE A REPLY

Please enter your comment!
Please enter your name here