Hmeichhe naupai mêk chuan a kut tansak anih avângin ṭanpuina a dil a, zahngaihna tel miah lovin car tlân lâi aṭangin an paih thla a, ‘sazu’ ang mai anih thu an sawi.
Mipa 2, an bân tansak ve tho te pawh chu car chak tak tlân lai aṭangin Silao bul, Central Mexican, Guanajuato state ah an paihthlâ bawk.
An 3 hian an thisen chhuah vânga an thihloh na turin hrui leh wire in an ṭawnsak hlawm a, an kut bûlte chu an bula sarang chhungah an dah sak hlawm a ni.
Hliam nasa tak tuar hmeichhia chuan a bul vêla mihring lo kalte hnenah ṭanpui a dil tih film aṭangin a hmuh theih a, “Khawngaih takin ka unaunu min phone sak rawh u, khawngaih takin ṭhiante u, phone number ka hrilh che u ang a, khawngaih takin min ṭanpui hram rawh u” tiin a ngen lawm lawm a ni.
He thil rapthlâk tak mai hi Trejo ho chênna bula thleng a ni a, Elite Group tia an koh mi nunrawng tak Jalisco New Generation Cartel (CJNG) te chuan an thiltih anih thu an sawi.
Misual rualte (gang) chuan a tuartute leh an kut bung dahna bag bulah thuchah râpawm tak mai an hnutchhiah tel bawk a, “Sazu ang maia thil ka ruk avângin leh mi ṭha leh mi thawkrimte ka zah loh avangin he thil hi ka chungah a thleng a ni. Hetianga thil titu leh ruk ruk chhunzawmtute chungah chuan hetiang thil hi a thleng zel ang” tiin an ziak a ni.
Alo thlîrtute chuan Municipal Civil Protection aṭangin damdawi lam thiam leh Police an ko ta a. An zavaiin an ngaihtuahawm hle a, damdawiin lamah dah luh nghal an ni.
Police-te chuan hmeichhia kum 25 naupai mêk leh mipa hming sawiloh kum 22 leh 23 mite chu kut bûl chungin motor aṭanga paihthlak an nih thu an sawi.
La Estrella a chêng chuan a tuartute chu Guadalupe bula khawsa an nih thu Zocalo a hrilh.
Police-te chuan hnuchhui hna an thawk mêk a, tumah man an la nei lo a ni.
Prosecutor chuan chanchinbu El Universal hnenah a tuartute chu an hriselna dinhmun a ṭhatloh avângin engmah thu zawhfiah theih an la ni lo tiin a sawi.
