Pa pakhat chuan a nupui leh a nuhrawn chu a kap hlum a, a fate erawh hliam tuar lovin tukverh aṭanga chhuakin an him a ni.
Clody Sylverne, 39, chu amah a inkah hmain a nupui leh a nu that a rinhlelh a ni a, a fa– kum 4, kum 8 leh kum 11 mite chu police-ten an chhanchhuak a ni.
Police-te chuan Pathianni zing dar 7am khân Tamarac, Florida inchhûnga tualthah-mahni intihhlumna thleng chu an chhuichiang mêk tih an sawi.
SWAT team inchhûnga lûtte chuan Sylverne leh hmeichhe pakhat thi an hmuh bâkah hmeichhe pakhat hliam na tak tuar an hmu bawk. Mahse, damdawiinah a boral thu puan a ni tiin Sheriff office chuan a tarlang.
Inchhûngah chuan naupang 3 an awm ve bawk a, Officers-te chuan naupangte chu an mutna pindan tukverh aṭangin an la chhuak a, hmun him lamah an dah tih an sawi.
Police thuchhuah chuan, “Tualthah-mahni intihhlumna thleng chuan puitling 3 thihna a thlen bakah naupang 3 nu leh pa nei lovin an awm phah a ni” tiin an tarlang.
Thil thlen chhan diktak hriat la ni lo mahse, an chhungkaw ṭhian hnaivai tak chuan an nupa inkârah buaina an neih thu a sawi.
A mittui dan tum hram chungin NBC hnenah, “Ka ring thei lo a ni, ka thinlung a keh chhe chiang hle mai.
“Ka ṭhianṭha ber a ni. A ni kha ka ṭhianṭha ber a ni. Ka phone ka silent avângin biak theih ka lo ni lova, ka phone ka en chiah chu missed call zawng zawng chu ka hmu ta a, engthil nge thleng ta?” tiin a sawi a ni.
