Nigeria police-te chuan mi 10– naupang 4, nu naupai lai 4 leh hmeichhe puitling 2 chu dân lo ang a nau neihtîrna hmun aṭangin December 1 khân an chhanchhuak a ni.
Police-te chuan Moe huamchhung, Southwestern Ogun State a ‘baby factory’ chu an luhkhung a ni.
Police thupuangtu Abimbola Oyeyemi chuan AFP hnenah, “Kan mite chuan dân lo ang a nau neihna in chu an va ṭhawng thut a, mi 10, naupang 4 leh nutling 6 (nu 4 rai lai) chu an chhanchhuak” tih a sawi.
Hmeichhiate chuan police hnenah, anmahni kawltu chuan mipa te chu raitîr turin a ruai ṭhin a, naute an hrinchhuah chu hlêp atân a hralh ṭhin tih an sawi.
‘Factories’ chu dân phalna tel lova private medical clinics niin, hmeichhia naupaite chu an fate hralh turin ruahmanna an siampui ṭhin a ni.
A châng chuan, hmeichhe naupang deuhte chu anmahni duhthu ngeiin kawl an ni a, pawngsual annih hnuah an nautê chu black market in an hralh ta ṭhin a ni.
Chindera Onuoha, a tuartu zinga pakhat chuan reporters te hnenah mipa nautê chu 250,000 Ningerian naira (£491) in an hralh ṭhin a, hmeichhe nautê chu 200,000 naira (£393) in an hralh ṭhin tih a sawi.
Oyeyemi chuan an mi rinhleh 2, taksaa rualbanlo leh clinic neitu fanu chu an man tawh tih a sawi a.
“He thil tihtîrtu nu (operator) chu a tlanchhia a, a phu tâwk hremna pe ngei turin man tumin kan bei mêk a ni” tiin a sawi bawk.
Oyeyemi chuan operator hi a hma pawhin hetiang thil avângin man alo ni tawh tih a sawi a, “Tunkum tîr khan mihring hmanga sumdâwnna (human trafficking) vângin man alo ni tawh a, bail a chhuah lailâwk tîr niin a hna ngaiah bawk a kir leh a ni” tiin a sawi bawk.
Police-ten dân phalloh a nau neihtîrtute an beihthut ṭhinna hi Nigeria ah chuan thil tlânglâwn tak a ni a, a bik takin south lamah a nasa zual a ni.
