Nigeria ramah Islamist firfiak pawl nia rinte’n lo neitu leh sangha mantu mi 110 aia tlem lo chu rapthlâk taka thatin an lu te an tan chhum a ni.
Borno state a hnathawktute chu phuarin an nghâwng an zai sak a ni.
He thil hi Boko Haram te thiltih anih ngei an ring a mahse an tih anih thu erawh an la sawi lo a ni. Mitthite chu an khaw mite’n nimin Pathianni khan vuina hun an hmang a ni.
‘Mihring 110 chuang chu zahngaihna tel miah lovin an that a, hliam tam tak an awm bawk’ tiin an rama UN’s humanitarian coordinator Edward Kallon chuan a sawi.
Inrinni a Boko Haram te thiltih nia puh insuatna rapthlâk tak thlengah, a tîrin ruang 43 an hmu a, a hnuah 70 aia tlem lo an thi tih an tarlang.
‘He thilthleng hi kumin chhûnga pawisawi lo inthahna rapthlâk ber a ni’ tiin Kallon chuan a sawi a, Boko Haram hming lam chuang lovin sawrkar sipai ni si lote (non-state armed force) chu a mawhpuh a,a dem hle bawk a ni.
‘He thil sual rapthlâk leh âtthlâk taka titu misual tâwpkhâwk te hi dân hmaah rorêlna an hmachhawn ngei ang’ tiin a sawi bawk.
Borno Governor, Babaganan Umara Zulum chu Pathianni khân Zabarmari thingtlâng khaw bul a ruang 43 an hmuhte vuina hun ah a tel ve a, ruang zawn hna thawh chhunzawm niin hei ai hian an la tam theih thu an sawi bawk a ni.
A tuartute zingah hian Sokoto state, North Western Nigeria a lo neitute an tam hle a, km 1000 (mel 600) vel a hla aṭanga hna zawng a kalte an ni.
He inbeihna ah hian 6 in hliam an tuar a, mi 8 an la hmu zo lo a ni.
Kallon chuan, ‘hmeichhia engemawzat an ru bo bawk a’ an rukte chu chhuah tûrin a ti a ni.
Nigerian President Muhammadu Buhari chuan Inrinni khân he thilthleng hi a dem thu a sawi a, ‘Atthlak taka maia inthahna thleng hian ram pumpui chu a tina hle a ni’ tiin a sawi bawk.
Borno state ah tualchhung inthlanna an neih lai a ni a, vote thlâk tura midang an kal hlânin he thil hi a thleng a ni.
Inthlanna an neih hun chu Boko Haram leh an elpui IS pâwl zawmtu Islamic State West Africa Province (ISWAP) ten an beih fo avângin vawi tamtak an sawn tawh a ni.
He pâwl 2 te hian thing zaitu, lo neitu leh sangha mantute chu sawrkar tâna enthlatu ah puhin an bei fo ṭhin niin an sawi.
Thla hmasa pawh khân lo neitu 22 te chu an hnathawh laiin Maiduguri bulah, ṭum 2 beiin an lo tihhlum tawh bawk a ni.
Jihadist indona avângin mi 36,000 vel tihhlum an ni tawh a, he thil avang hian kum 2019 aṭang khân mi maktaduai 2 velin an in an tlân chhuahsan tawh a ni.
Hetiang tharum thawhna hi a ram ṭhenawm Niger, Chad leh Cameroon te pawn an tuar ṭhin a, chuvâng chuan firfiak ho dona kawngah thawhhona an nei fo ṭhin bawk a ni.
