India ram, Tamil Nadu-ah pa pakhat chuan a fapa thla 6 mi lek chu a leiba rulh nan ₹10,0000 in a hralh tih hriat niin, he pa hi Police-ten an man nghal tih an sawi.
Police-te sawidanin he thil thleng kaihnawihah hian a ṭhianpa pawh an man tel nghal bawk. Naute hralh tur hian a thianpain a thlem niin an sawi.
Naute hralhtu bakah a leitu pawh an man zui tih an sawi. Pawikhawihtu a puh hi Sowkath Ali tia koh niin Linemedu, Salem a chêng a ni.
A ṭhianpa hming chu Seddu niin Dhadhagapatty lam mi a nia, an naute hralh chu Sundaram chuan a lei ta a ni tih TOI chuan a tarlang.
Ali nupui chuan thla 6 liamta khan fapa a nei a, Thawhṭanni khan a chhungte chu naute en turin an lo kal a, Ali chuan naute chu a boral tih a lo hrilh hlawm a ni. Thil diklo a awm ngei nia ngaiin Annadhanapatty police station ah thubuai an thehlut zui ta a ni.
Ali chuan lockdown chhung zawngin hna a nei lova, Seddu hnenah pawisa chu pûkin, Seddu chuan rûl tûrin a nawr ṭhin tih a sawia, Seddu ruahmanna in a fapa chu a hralh ta a ni tih a sawilang bawk.
Police-te chuan naute chu Sundaram inah an hmu a, Ali nupui Sharmila Bhanu hnenah an pe kir leh tawh niin an sawi.
Naute pa, a thianpa leh naute leitute chu judicial custody ah ni 15 chhûng an awm hnuin, Salem Central Jail ah thawn phei an ni.
