MOSCOW: Nimin Thawhtanni (Nov. 23) khan Russia’s Far East republic of Yukutia a mi 7-te chu tûnlai hrileng vânga hman lâr tak tui nena pawlh dal hand sanitiser an in avângin an thi a, midang 2-te nikhua hre lovin an awm bawk a ni.

Russian Investigators ten an thuchhuahah chuan, Inrinni khan Tomtor thingtlâng khuaa mi 9-te chu an khawchhûng dawra mi tui nena pawlh dal hand sanitiser an in avângin an damlo nasa hle tih an tarlang a ni.

Investigators te chuan thil thlenna hmunah litre 5 bûr lo in hawng sa in an va hmu a ni.

Bâwm chhung a awm chu an zirchian atangin 69% methanol, zu in loh chi a pai tih an hmuchhuak a ni.

A tuartu mi 3-te chu a hmunah an thi nghal tih an sawi a, midang 6-te chu damdawiinah thlawhtheihna in an bialchhunga khawpui Yakutsk ah thlawhpui an ni a, mi 4-te chu damdawiinah an thi a ni.

Doctor-te chuan mi 2, hmeichhia kum 48 leh mipa kum 32 a upate chu an nunna chhanhim turin nasa takin an bei mêk a, an pahnih hian nikhua hre lovin ventilator nen an awm tih health authorities lam chuan Thawhtanni khan an sawi a ni.

Yakutia’s health authorities te chuan Sunday (Pathianni) khan Methanol telna hand sanitiser chu hman khapna thu an chhuah nghal a ni.

Inthlahdah avânga thihna thlengah ngaiin thubuai ziahluh a ni bawk.

Russia hmun thenkhata rethei zawkte chuan, a man a tlâwm avângin ruih nân zu aiawh atân hman an tum thin a ni.

Russia ramah hian kum engemaw liamta atang khan zu man pawh a hniam tawh a, mahse thuneitute’n March thla atanga lockdown an puan hnu atangin zu man chu alo to chho leh ta a ni.

Hetih mêk lai hian, Yakutsk Governor chuan Khawpui chhung leh a chhehvela district huamchhungah kar engemawzat chhung zu zawrh a khap a ni.

LEAVE A REPLY

Please enter your comment!
Please enter your name here