Mi hausa tawntaw a nihna thuptu chuan hmeichhe naupang kum 4 mi nun inthlâk hlawk turin surgery tih nân pawisa £75,000 a pe a, a vawikhat nan ke in a kal theih phah dawn bakah Disneyland a zinna tur a pe bawk a ni.
Emily Anderson, Doncaster, South Yorkshire mi chuan ‘Cerebral palsy’ natna a nei a mahse a chetsawn leh theihnan Selective Dorsal Rhyzotomi (SDR) chu NHS ah chuan neih a har hle a ni.
Hmeichhe kum 4 mi nu Paula Ratcliff, 34 leh apa Anderson, 36 chuan an fanu wheelchair a thu reng chu mi ngilnei tak pakhat in a suangtuahna a hlawhtlintîr ta a ni tiin an sawi.
Kâr hmasa khân Paula chuan private spinal surgery tihna tur £75,000 chu online in tanpuina a hawng tan a.
Darkar 24 chauh aliam tihah hming hriatloh atangin pawisa an mamawh tur zawng zawng chu a tum vek tur thu leh Disneyland a zinna tur pawh a tum nghal tur thu alo sawi a ni.
Paula chuan, “Thilpêk rawn petu in min rawn biak lai chuan, ka hringnunah a vawikhatna atan sawi tur hre miah lovin ka awm a, ka hnuk a ulh nasa hle a ni” tiin a sawi.
Tanpuina kan dil atangin darkar 24 chauh aliam tihah, phone call ka dawng ta a, pawisa an mamawh tur ang chu pêk annih thu alo sawi a, a hming erawh sawi duh lovin a thup tlat tiin a sawi a ni.
‘Vawilehkhatah ka beisei loh thil alo thleng thut mai a ni. Chupa chuan damdawiin a inenkawlna senso zawng zawng peksak a tum bakah Disneyland zinna tur thlengin a pe tel hi a makin a âwih awmlo hial zawk a ni’ a ti bawk.
‘Hepa chunga kan lawmzia hi sawifiah thiam rual a ni lo, ka fanu chunga rinna min neihpui hi ka lawm takzet’ a ti bawk.
Emily nu leh pate chuan Emily chu naute ṭhan dân tûrin a ṭhang lo tih an hriat chuan damdawiinah an hruai ta a, a thahruiah diklohna an hmu ta a ni.
Kum 2017 khan Cerebral palsy natna avei tih an hmuchhuak a, MRI scan an neih atangin a thluak veilam a chhia tih an hmu a, achhanchu anu pum chhûngah anih dân tûr anga insiam hman lovin a lo pianchhuah vang a ni. Chuvângin Dâktawr te chuan a damchhungin a ṭawngtheih leh kal theih an ring tawh lo a ni.
A nu Ina awmpui rengtu chuan surgeries tihna hrang hrang a zawng kual thin a, tichuan Selective Dorsal Rhyzotomi (SDR) chu a hmu ta a ni.
Paula chuan, “Emily ke a tihrawl leh nerve hi a thluak nen a inzawm lova chuvângin a nerve hi surgery in paih ni sela a ke a tihrawl che thei lo chu tlêm tlêm in hna a thawk ṭan thei ang a. A din ngil theihlohna leh ke a a ṭhut theihlohna chu tihtheihna hunṭha a nei thei tawh dawn a, a kal thei dawn a ni” tiin a sawi.
Vanduaithlâk takin NHS ah Emily tan a tih theih lova, mahse keimahni leh private-a kan mi râwn chuan kan thiltih tum chu a thatpui ngei kan ring tlat a ni tiin a nu chuan a sawi bawk.
‘Surgery tih hi a len hnu aiin ala naupan lai hian a thawk ṭha zawk dawn a, chuvângin kan nghâk khawmuang duh lo a ni.’
A taksa che sawn theilo mahse Emily chuan beiseina a neihtir reng a, tunkum a speech therapy an neihnaah pawh a titi duh tak viau avângin chhuahtir a ni.
Tunah hian uluk takin physiotherapy neihpui reng a ni a, a hmalam nun thlâk danglam tura surgery an tih hun atan a pui nasa dawn a ni.
Mi tu tih hriatloh atanga ṭanpuina an dawn atangin Emily nu leh pate chuan December thla atanga treatment ti ṭan turin an ti fel tawh a ni.
Paula chuan, “Emily hi rilru lamah chuan a hriatna a tha in a fing em em a ni- a ke chauh hian a ti chaklo a ni” tiin a sawi bawk a ni.
‘He surgery hian a nun a thlâk dawn a, a tan thil ropui tak a ni. A sikul kalnaah a thiante bula infiamte a châk ve em em a, zirtirtu leh thian fel tak tak ṭanpuitu a nei reng bawk a ni.’
‘John leh kei, Emily unaute Katie, 16, Charlotte, 12 leh Mia, 16 months te chuan hmalam hun kan thlir a, hmalam hun duhawm tak aneih ngei kan duhsak em em a ni.
Paula chuan afa enkawl dân tur chungchanga thurawn petu an awm chuan a lawm hle ang tih a sawi a, Emily chu naupang duhawm leh polite tak a ni a, he hun tha hian a thil duh em em thlentîr in a kaltîr thei ngêi ang tiin a sawi bawk a ni.
