Cuban actress lâr tak mai Broselianda Hernandez, lemchan lama kum 30 dawn lai lo thawk tawh chu Miami beach-ah a ruang chhar a ni a, tuiah a tla nî a hriat a ni.

Hernandez, 56 hi Miami-ah kum 5 chhung chu a chêng tawh a, kum 1980 chho vel atanga Cuba rama entertainment lama eizawnna a tlak hniam avangin alo insawn tih thuneitute chuan an sawi.

Damdawi lama endiktute chuan a thih chhan la puangzar lo mahse, Police-te chuan tuia a tlak vang anih an ring a, midang inrawlh an awm an ring lo a ni.

Lo hmu hmasa bertu chuan dar 6:30am bawr vel Nilaini (Nov. 18) khan Police-te ko in 79th street tuichim chinah ruang a hmuh thu a sawi tih Miami Beach Police thupuangtu Ernesto Rodriguez chuan a sawi.

Local 10 station chuan a ruang buaipui tura lo thleng hmasate video a lakah, a ruang chu an laksawn hmain ṭhelretpuan eng in a tuam tih a hmuh theih a ni.

Officers leh chhanchhuah hna thawktu pawlte chuan a hnuah Hernandez anih thu an tichiang ta a ni. A chhungte chuan meizial lei tura chhuak anih thu an sawi a, alo let tawh miah loh bakah phone pawhin alo be hlawm lo tih local news outlets chuan an tarlang a ni.

Hernandez chu kum 1990 chho velah Cuban soap operas atanga lâr chho in, ‘When Water Returns to Land’ tih film a chan laiin lâwmman a dawng a, Woman of Honor chawimawina a dawng hial a ni.

Kum 2010 khan Cuban Independence hero,Martí, the Eye of the Canary ah Jose Martí nu angin a chang bawk a ni.

Film a chan dang hriat reng tlâk tak chu– Things I Left in Havana leh Barrio Cuba te hi an ni bawk.

Hernandez film channa hnuhnung ber, ‘The Companion’ tih chu kum 2015, Miami-a a insawn kum vel khan tihchhuah a ni.

Cuban President Miguel Díaz-Canel chuan nimin Ningani khan a chhungte hnenah a tawrhpuina thu Twitter ah ziakin, “Lemchanthiam zinga a hming dai tawhlo tur Broselianda mangtha mai le. Kan tuarin i kal hma lua a ni. A chhungkua leh thiante kan tuarpui takzet.” tiin.

Cuban zaithiam Liuba Maria Hevia pawhin instagram atangin Hernandez thlah dan hi a thiam ngai arinloh thu a sawi chhuak a ni.

Kum 2010 a Spanish-language news outlet Cuba Debate in an kawmnaah, Hernandez chuan ‘very bipolar’ intiin natna chi hnih a neih thu a sawi a, depression vanga harsatna a tawh nasat thu a sawichhuak a ni.

‘A chang chuan kum 80 mi angah te ka inngai thin’ tiin amah kawmtu hnenah rilru lama harsatna a neih dante a sawichhuak bawk a ni.

Hernandez chu a fanu Sofia, a pasal leh a nu leh pa upa tawh takten a natna ata hi an chhanchhuak a ni.

LEAVE A REPLY

Please enter your comment!
Please enter your name here