WASHINGTON— Trump tana kum 2016 electiona data and strategy director lo ni thin Matt Braynard chuan a nupui nen Dominican Republic a vacation hmang tur an ni a, election data a inbumna awm chu chhui chiang turin a thulh phah tih hriat a ni. A nupui nen hun hman chu pawimawh viau mahse “Tun hi min mamawh hun leh ka tangkai hun tak a ni” tiin YouTube ah November 8 khan a sawi.
Braynard chuan Campaign teamte ko khawmin, State 6- Pennsylvania, Georgia, Michigan, Wisconsin, Arizona leh Nevada a vote inmil lo te zawnchhuah hna an thawk tan dawn tih a sawi.
Tunah hian vote felhlel kaihhnawihah mi 1.25 millions vel awm tawhin, phone call leh an database hmangin an bawhzui mek a ni.
An hmuhchhuah tam ber chu post office ah an ram awmna thlak a, State danga insawn tawh si, mahse 2020 election ah erawh an insawn hmaa an awmna state hluiah vote thlak tho si ang hi an tam em em a ni.
“An vote chu an mahni thlak nge ni a, midangin an hmingin an thlaksak tih chian turin phone call in kan be hlawm” tiin Braynard chuan the Epoch Times a hrilh a ni.
Georgia ah Trump Teamte chuan vote 17,877 chu vote hma taka thlak (early vote) leh anmahni awm tawh si lo, hmun danga insawn tawh an ni tih an hmuchhuak a, he State a an inthlauhna aiin a tam zawk a ni. Tuna vote chhiar mekah November 13, 1:00pm ah khan Joe Biden an Donald Trump aiin vote 14,164 in a hmu sang zawk a ni.
Georgia Secretary of State Brad Raffensperger chuan presidential election vote chhiar that leh ennawn chu November 13 khan a tantir a, November 18 zanah chhiar zawh hman beisei a ni. Georgia chuan November 20 ah chuan election result chu puan fel hman ngei an tum bawk a ni.
Braynard teamte chuan ram danga pem tawh vote heng stateah te hian an hmuchhuak bawk a, Pennsylvania ah voters 7,426, Wisconsin ah voters 6,254, Nevada ah voters 5,145, Arizona ah voters 5,084 leh Michigan ah voters 1,688 an hmuchhuak a ni.
Tuna an hmuh chhuah leh an chian (confirmed) tawh chu vote pahnih nei (double-voters) Pennsylvania ah 631 leh Nevada ah 987 an hmuchhuak tawh a ni. Heng hi election a vote thlakte an enfiah hmaa an hmuhchhuah a ni.
“State danga insawn tawh tam lutuk ka hmuh khan mak ka ti hle mai a. Hei hian chiang taka a lantir chu hmun danga awm anga inziak an tam teuh dawn tihna a ni” tiin Breynard chuan a sawi. Case tam tak kan hmuhchhuah atangin, State an chhuahsan tak atangin vote an thlak bakah, an va insawnna state ah pawh vote an lo thlak tho tih alang chiang em em a ni a ti bawk.
An awmna address inthlak ho chungchangah Breynard team-te chuan vote thlakna tur lehkha dawng si a, lo thawn let tawh lo te an be bawk a, Ballot an dil leh dil loh te, an dil anih chuan an thawnlet leh letloh te an zawt bawk a ni.
Phone call hmanga an biak thenkhatte chu vote vawikhatmah la thlak ngailo te mahse vote thlak hma tak si leh anmahni awm si lo te an bia a, vote anmahni ngeiin an thlak leh thlakloh an be bawk a ni.
Tun dinhmunah Breynard team-te chuan mi 100 chuang ziaka chhechham nen meuha nemnghet ngam, thudik puangchhuak duh an awm mek tih an sawi a, chu thil chu lawyer’s ten an duh chuan affidavit ah an hmang thei tih an sawi bawk. Braynard chuan thil pawimawh an hmuhchhuah ang ang chu Trump Campaign team-te hnenah a pek chhawn vek thu a sawi lang bawk.
“Mihring damlai ngeiin, ‘Ka hmingin vote thlak a ni a, vote ka thlak loh bakah vote thlakna lehkha pawh ka dil lo hrim hrim’ tia sawitute an awm a, chu thil chu buaina chhânna pek ngei ngai chu a ni” tiin Braynard chuan a sawi.
Tuna ka hnathawh hian he inthlan hi a thlak danglam kher lo a ni thei, mahse vote thenkhat chu chhiar that emaw an nihna chian ngaite chian annih phah ngei ka ring tiin a sawi a, hmalam hunah chuan inthlanna dik leh fel tak a awm phah ngei ka beisei a ti bawk a ni.
Trump Campaign team-te chuan November 11 ah khan mitthi tawh tam tak, an hminga vote thlak si te an tarchhuak teuh bawk a ni.
Third-party analysis te chuan Michigan ah voters 9,500 an hming leh pian ni leh kumte Social Security Death Index mitthi tawh record nena inmil vek an hmuchhuaka mahse, Logan Churchwell, spokesman for the Public Interest Legal Foundation chuan hetianga lo inmil hi a proof na tak tak a ni thei lo, zirchian ngai thil a ni, a chhan chu mihring hming leh pianni leh kum in ang an awm teuh thei tlat tiin a sawi a ni.
“Atawp berah chuan, he election a inbumna awm kan phawrh chhuak a ni thei, kan thil chhui hi a tawpna a ni lo tih in hriat ka duh” tiin Braynard chuan a sawi.A Sawi zel danin,” Biden a tantu i nih a, he election hi a thianghlimin engmah thil diklo a awm love i tih chuan, kan hnathawh hi min thlawp rawh u, a chhanchu, in sawi dik anih chuan chu chu kan ti chiang thei bawk dawn a ni” tiin a sawi bawk a ni.
