November 12: Khalifa bin Salman al-Khalifa hi Bahrain in British hnen ata zalenna (Independence) kum 1971-a ahmuh atang khan Prime Minister la ni reng in, nimin Nilaini (Nov. 11) khan kum 84 mi niin United States ah a boral.

Khalifa chu Mayo Clinic Hospital, Rochester, Minn,. ah a boral tih Bahrain government official chuan an sawi a ni. A thih hun thlengin, he khawvelah hian amah tluka Prime Minister nihna chelh rei an awm lo a ni.

Khalifa hian Prime Minister hna hi Bahrain in independence a hmuh atang khan alo chelh tawh a, Persian gulf ram zinga mihring 1.5 million zingah ngaisangtu an tam hle a, a thlalak leh an ngaihsanna thuziak hmuh tur a nasa hle a ni.

Khalifa hi Sheikh Salman bin Hamad Al Khalifa fapa a ni a, apa pawh hian he thliarkar ram hi British in an awp chhung zawng khan kum 20 dawn lai mai ro alo rel tawh a ni.

“Prime Minister hi ramin hma a sawn chhohna chhan bulpui ber a ni, tunlai khawvel mila thangchho turin hma nasa takin ala a, tunah chuan a tha lama nghawng neiin, Bahrain chu ram hmasawn takah a awm theih phah” tiin Bahrain government chuan an thuchhuahah an tarlang.

“Nasa taka abeihna te, a hmathlir thui tak leh rorel a thiamna te chuan he lalram tan hian hmasawnna nasa tak a thlen a, khawvel huap pawha ram hmasawnah siamin a ti hmingtha bawk a ni. A mawhphurhna a hriatchianna chuan ram than chhohna kawngah rorel thiamna a neihtir a ni” tiin an tarlang bawk.

An sawrkar chuan, Khalifa chu a ram mipuiten dinhmun tha an neih theih nan leh Bahrain ram a intodelh (economically) theihna turin a thawkrim zual hle a ni an ti bawk.

“Heng a hriatnate avang hian, kum tam tak ram a hruaina kawngah hmathlir thui tak a neihtir a, Bahrain chu ram hmasawn takah a awmtir a, hetiang dinhmun a hlangkai tu leh sulsutu hi a entawntlak in a chungah kan lawm tak meuh a ni” tiin Bahrain government chuan an tarlang bawk a ni.

Thla hmasa October khan, a vawikhatna atan Israel sawrkar nen pangai taka thawhdunna an siam a, Middle Eastern ramte zingah tunhnaia Israel nen thawhhona siamthei ram palina a ni bawk a ni.

LEAVE A REPLY

Please enter your comment!
Please enter your name here