Texas a nupate chu an fanu kum 5 mi corona virus vanga a thih avangin an rilru a na hle a, damdawiin atanga an haw tir hnu reilo ah a boral zui a ni.
Kar hmasa khan, Tagan White, Amarillo mi chu a mut nilen avang leh a luak bawk avangin test tir a ni a, Covid-19 a vei tih an hmuchhuak ta a ni tiin KAMR chuan a tarlang.
Emergency room a Daktawr chuan a nu leh pa Lastassiza White leh Quincy Drone hnenah virus chuan a taksaah hna a thawk chak lutuk lovang, Tagan-i hian chawlh hahdam a mamawh tih a hrilh hlawm a ni.
Chumi zan zinglamah chuan, Tagan nu chu a roomah ava kal chuan naupangte chu biaktheih alo ni tawh lo a ni.
Damdawiinah rang takin kalpui nghal a ni a, mahse an tlai ta, darkar a liam hnuah Tagan-i chu a thih thu an puang ta a ni.
‘Ka fanu hi a hriselna a tha tawk a ni, a hrisel lutuk a ni’ tiin White chuan KAMR a hrilh a ni.
‘Hetiang thil a thlen theihna chhan tur hi a awm lo a ni’ tiin a sawi bawk.
Tagan’s nu leh pate chuan an fanu chu pawna a chhuah dawn a piangin mask vuah turin an zirtir thin thu an sawi a, achang chuan Ragan zawkin mask vuah turin a hrilh hlawm thin a ni tiin an sawi.
October 27, thawhlehni ah a nu leh pate chuan thil dik lo a awm tih an hre tan ta a ni.
‘A muhil char char ringawt mai a, Thawhleh a nia, Nilaini anih thlengin’ tiin White chuan KAMR a hrilh a ni.
‘Thil chu a eiin ala in reng a, Nilai zan alo thlen chuan a luak ta a. Ningani ah chuan ER (Emergency Room) panpui turin thu ka ti tlu ta a ni.
Emergency room ah chuan Covid-19 a vei tih kan hre ta a ni.
American Academy of Pediatrics sawidan chuan, hripui len tan tirh atangin naupang 8,50,000 aia tamin Covid-19 an kai tawh a ni.
Nimahsela, pawl (organisation) pakhat in an zirchianna thar berah chuan, Covid-19 vanga ‘naupang damdawiina lut leh thi’ hi chu thil thleng khât leh vâng tak a ni’ tiin an tarlang a ni.
White chuan, a result a positive tih kan hriat hnuah, Daktawr chuan in lamah min hawtir a ni tiin KAMR a hrilh bawk.
‘Daktawr chu alo lut a, min chhuahtir a, a that tur thu chauh min hrilh bawk a, naupang chungah chuan virus in a thawk lutuk lovang, upa ho bulah chuan an awmloh a tha zawk’ tiin anu chuan a sawi a ni.
A nu leh pate chuan khawi damdawiinah nge an kal tih an sawi lo a ni.
Tagan’s nu leh pate chuan khumah an muttir a, White chu zing dar 3 velah a thawh chuan, Ragan chu la thaw mahse nikhua a hre tawhlo a ni.
A rang thei ang berin 911 an call a, ambulance in damdawiin an panpui nghal a mahse a boral zui ta a ni.
‘He Daktawr hian kan fanu chu a that tur thu min hrilh a, mahse kan fanu hian darkar 24 chhung pawh a tuar zo si lo’ tiin Ragan pa, Drone chuan KAMR a hrilh a ni.
‘Darkar 15 a liam hnuah a boral ta a ni.’
A nu leh pate’n Ragan’s chanchin hi mite hnenah hriattir an duh chhan chu, Covid-19 hi naupangah pawh a hlauhawmzia an hriatchian lehzual an duh a ni.
‘Nu leh pa kan nih angin kan fanu kha chhanchhuah theih a ni’ tiin Drone chuan tualchhung station hnenah a sawi a ni.
‘Kan duhdanah chuan, naupang tan alo hlauhawm lo anih pawhin, in lamah khan min enkawl tir lo sela. Thil an tisual palh a ni…thil an tihsual nasat lutukna chu naupang kum 5 mi in nunna a chan phah’ tiin apa chuan a sawi bawk.
“Hetiang thil hi a thlen tawhloh nan, midangte hriattir nan kan hmang duh a ni. Tuna kan awmdan a sawi pawh sawifiah thiam rualloh ang hian nu leh pa dangte an awm ve kan duh lo a ni” tiin an sawi a ni.
