Nimin Pathianni (Sunday) khan thlipui na tak mai super typhoon Goni chuan darkar khatah km 225 (140 miles) a chakin Philippines a nuai chiam. Super Typhoon Goni hian mi 30 chuangin nunna a lak bakah mi maktaduai 30 chuang zet chu dinhmun hlauhawm ah dahin nunphunh a nghawng mek a ni. In chung tamtak a tihchhiat bakah, kawlphetha ban a ti tlu rem rum a, a tleh nat zualnaah phei chuan tuilian a siam a, mi sang telin an chenna in an chhuahsan a ni.

Kumin chhung bikah chuan he super typhoon hi thlipui tleh na ber nia sawi niin, chhim lama thliarkar lar tak Luzon ah chuan leimin siam zuiin in tamtak a chhilh tih thuneitute chuan an sawi.

An ramchhunga khaw chinchang zir mite chuan he Goni hian chhiatna nasa tak a thlen thei tih tarlangin mipuite hnenah inralrinna thu an puang lawk bawk a ni.

He lai chhehvel hi kar hmasa pawh khan Typhoon Molave in a lo nuai tawha, mi 22 in nunna an lo chan tawh bawk a ni.

Mi 400,000 dawnin an chenna in chhuahsanin tawmhimna in (evacuation center) lam an pan tih Civil Defence lam chuan a tarlang.

Thli tlehna hmun hrang hranga thuneitute chuan kawlphetha a chhiat nasat avangin, inbiakpawhna lampangah pawh nghawng a nei nasa hle tih an sawi.

An kawngpuite pawh kaltlang theihlohin a awm nual a, Manila ah chuan an airport pawh khar niin, sipai leh police sang chuangin, mipuite hmun him lamah thiar chhuah hna an thawk bawk a ni.

Phillipines hi chawhrualin kumtin thlipuiin vawi 20 vel a nuai ziah thin a, hei vang hian mi harsa an tam phah hle.

Corona virus vangin sikul in zawng zawng khar anih avangin, sikul inte chu sawrkarin mipui tawm him nan a hmang tangkai mek a ni. (VIDEO)

LEAVE A REPLY

Please enter your comment!
Please enter your name here